moedersdagresepte
moedersdagresepte

Maklikste, min moeite Moedersdagresepte

Baie ma’s onthaal op Moedersdag en ons het self min moeite Moedersdagresepte gesoek en bekende kosskrywer Carmen Niehaus gevra om vir ons ’n spyskaart saam te stel.

Op ons min moeite Moedersdagspyskaart

Voorgereg 

Oosterse baba-inkvistentakelslaai (roerbraai) of frittata-tertjies (oond of lugbraaier)

Hoofgereg

Franse Oondhoender (oond of lugbraaier)

Gebakte gemarineerde blomkool (oond/lugbraaier)  

en/of masala-koeskoes (deels oond of lugbraaier)  

Mengelslaai met piekelgemmer

Nagereg

Kaaskoek

Carmen Niehaus se maklikste, min moeite Moedersdagresepte

Voorafhappies

“Die frittata-tertjies (met heelwat groente en gemarineerde songedroogde tamaties) wat koud of warm bedien kan word, is heerlik vir staan-staan vooraf geniet saam met ’n wit wyntjie terwyl die babatentakelslaai ideaal is vir ’n mooi gestileerde voorgeregbord.

Frittata-tertjies 

Lewer 6-8 groot muffins

Bereiding: 20 min.

Bak: 25 min.

2 uie, gekap

olie

200 g gerasperde murgpampoentjies en/of spinasie

100 g fyngekapte sampioene

6 repies bladspek, gekap, of 2 gaar hoenderborsies, gepluis

250 ml (1 k) gerasperde sterk cheddarkaas

1 wiel feta-kaas, grof gekrummel

5 ml (1 t) aangemaakte mosterd

250 ml (1 k) ertjies (opsioneel)

20 g gekapte kruie soos pietersielie of koljander

4 songedroogde tamaties in vinaigrette

6 eiers

sout en peper na smaak

80 ml (⅓ k) natuurlike jogurt

30 ml (2 e) mielieblom

Voorverhit die oond tot 180 °C. Bespuit 8 holtes van diep muffinpanne deeglik.

1 Braai die uie in ’n bietjie olie tot glasig, voeg die groente by en roerbraai tot net sag en tot alle vloeistof verdamp het.

2 Voeg die spek of hoender, kaas, mosterd, ertjies en kruie by. Meng en skep in die goedgesmeerde muffinholtes. Sprinkel die tamaties bo-op elk.

3 Geur die eiers met sout en peper, voeg die jogurt en mielieblom by en klits goed.

Giet oor die groentemengsel in die muffinholtes.

4 Bak sowat 25 min. of tot ferm. Sit louwarm of koud voor.

Of

Oosterse baba-inkvistentakelslaai 

Die inspirasie vir hierdie slaai kom eintlik van die sushi-slaaibakkies wat met krapstokkies gemaak word en ’n mens gereeld by sushi-toonbanke aantref. Die Oosterse slaaisous saam met die piekelgemmer is heerlik hierby. Heerlik vir ’n vooraf happie.

Maak sowat 10 happies slaai

BEREIDING: 20 MIN.

GAARMAAK: 5 MIN.

Slaai

500 g bevrore baba-inkvistentakels

15 ml (2 e) hoisinsous

1 x Oosterse slaaisous (onder)

’n halwe komkommer, in lang, dun repe gesny

1 wortel, skoongeskraap en in julienne-repies gesny

2-3 stingeluie, in dun repies gesny

’n kwart kopkool, in papierdun skyfies gesny

1 avokado, in dun skyfies gesny

’n groot hand vol gekapte koljanderblare (opsioneel)

Vir voorsit

piekelgemmer

sesamsaad

Slaai Giet die hoisinsous oor die inkvistentakels en stoom tot dit net gaar is, sowat 5 min. Giet helfte van die slaaisous oor terwyl dit nog warm is.

2 Meng die res van die slaaibestanddele, voeg die tentakels by by en meng liggies deur. Voeg nog sous by soos nodig.

Vir voorsit Skep die slaai in ’n opdienbord, of as jy enkelporsies wil voorsit, in klein Chinese lepeltjies en sprinkel die piekelgemmer en sesamsaad oor.

Oosterse slaaisous

Maak sowat 250 ml (1 k) slaaisous

Bereiding: 10 min

80 ml (⅓ k) kanola-olie

45-60 ml (3-4 e) rysasyn

sap en gerasperde skil van 2 suurlemoene

15 ml (1 e) heuning of bruinsuiker

80 ml (⅓ k) sojasous

5 ml (1 t) vissous

1 knoffelhuisie, geskil en in vlokkies gesny

30 ml (2 e) sesamsaad

3 cm gemmerwortel, geskil en in dun repe gesny

1 heel brandrissie

Meng al die bestanddele saam buiten die brandrissie. Giet in ’n glasfles. Plaas die heel brandrissie in die bottel. Maak toe. Gebruik soos benodig.

Wenk: Jy kan selfs lappies gerookte forel by die slaai inmeng.

Hoofgereg

Franse oondhoender

“Die Franse oondhoender is my go to vinnige, in die oond druk hoendergereg waarop ek altyd terugval vir gaste, veral as ek heelwat mense moet kosgee.”

Caremen Niehaus

Genoeg vir 6—8 mense

Bereiding: 20 min

Gaarmaak: 1¼ uur

Marinade

2 knolle knoffel of andersins swart knoffel

60 ml (¼ k) olyfolie

60 ml (¼ k) houtverouderde balsemieke asyn

80 ml (¼ k) basilieblare of oreganum

Hoender

12 hoenderporsies (dytjies en boudjies maar nie borsies), helfte se velle verwyder

Sout en peper

250 ml (1 k) wit wyn

125 ml (½ k) kappertjiesaad (verkieslik met lang stele)

30 groen olywe

125 ml (½ k) veelkleur-sultanas

100 g Turkse appelkose, gekap

12 pruimedante

40 g vars koljander

Voorverhit die oond tot 180°C. Smeer ’n oondbak.

1 MARINADE Mikrogolf die knoffelbolle, skil en al, vir 3-5 minute of tot hulle sag is, (die swart knoffel kan jy net so gebruik), druk die puree uit en meng met res van die bestanddele vir die marinade. 

2 HOENDER Pak die hoender in ’n nie-metaal oondbak, giet die marinade oor die hoender en marineer vir ’n uur of twee. Geur met sout en peper, voeg die wit wyn oor en voeg die kappertjiesaad, olywe en droëvrugte by asook helfte van die koljanderblare.

3 Bedek en bak 1¼ uur tot die hoender sag en gaar en goudbruin is. Sprinkel die orige koljanderblare oor en sit voor met gestampte koring of koeskoes en slaai.

Gebakte blomkook met blomkoolpuree en kruie vinaigrette

Genoeg vir 6 mense

Bereiding: 40 min

Baktyd: 40 min

Marinade

180 ml (¾ k) sojasous

80 ml (⅓ k) olyfolie

30 ml (2 e) fyngerasperde suurlemoenskil

5 ml (1 t) suurlemoensap

5 ml (1 t) elk fyn komyn, koljander en paprika

1,25 ml (¼ t) elk cayenne-peper en gerookte paprika

Blomkool

1 groot of 2 klein blomkole

Olyfolie

Blomkoolpuree

400 g afvalstukkies blomkool

125 ml (½ k) elk volroommelk en room

Sout en peper na smaak

Slaaisous

60 ml (¼ k) kruie soos pietersielie en basilie, grof gekap

4 knoffelhuisies, gerasper

60 ml (¼ k) olyfolie

45 ml (3 e) appelasyn of druiwe-asyn

10 ml (2 t) growwe mosterd

Suiker na smaak

Sout en peper na smaak

1 BLOMKOOL Meng al die bestanddele vir die marinade.

Pak die blomkool in ‘n bak en giet die marinade oor. Laat staan 2 uur of oornag.

2 BLOMKOOLPUREE Plaas die blomkoolstukke in ‘n kastrol en giet melk en room oor. Geur met sout en peper. Kook tot lekker sag. Puree met ‘n staafmenger tot glad.

3 Verhit die oond tot 200˚C. Plaas die blomkool op ‘n bakplaat en giet olyfolie oor.

Oondbraai tot die blomkool verbruin het maar net-net sag is, sowat 40 min.

4 SLAAISOUS Plaas al die bestanddele in die voedselverwerker en verwerk tot glad.

VOORSIT

Skep die blomkoolpuree op ‘n bord. Plaas die blomkool bo-op en giet van die slaaisous oor.

of

Masala koeskoes

Pleks van koeskoes gebruik ek baie keer sorghum in hierdie resep om dit so ’n inheemse Afrika-geurtjie te gee. Daarby werk jugo-bone, ook eie aan Afrika, goed. Dit het ’n effense grondbone smaak.

Genoeg vir 6-8 mense

Bereiding: 20 min

Gaarmaak: 15 min

1 sakkie (500 g) botterskorsie- of pampoenblokkies

1 sakkie (500 g) patatblokkies

1 klein blomkool, in blommetjies gebreek

2 uie, gekap

1 rooi soetrissie, ontkern en in blokkies gesny

60 ml (¼ k) olyfolie

Sowat 15 g Masala Chai-sout (CarmenNiehaus) of andersins geroosterde masala en komyn vir oorsprinkel

1 blik (400 g) kekerertjies of jugo-bone, gedreineer

2,5 ml (½ t) elk fynbossout (CarmenNiehaus) of gewone sout, paprika en komyn

250 g Marrokaanse koeskoes, geweek in 500 ml (2 k) chai-rooibostee, gemaak met 4 sakkies Fokus van Carmien

Gerasperde skil van 1 suurlemoen

200 g rugspekvleis, in stukke gesny (opsioneel)

Sowat 180 ml (¾ k) fynbosslaaisous (CarmenNiehaus) of lemoenslaaisous

20 g koljanderblare vir bo-oor sprinkel

Voorverhit die oond tot 190°C.

1 Meng die groente met die olyfolie en vryf goed met jou hande deur. Geur met die Masala Chai-sout of andersins geroosterde masala en komyn en meng weer lekker deur met jou hande. Skep in ’n enkellaag in ’n oondpan en oondbraai sowat 30 minute of tot gaar en effe bros. Skep uit.

2 Pak die kekerertjies of jugo-bone in ’n enkellaag in die lugbraaier, sprinkel die sout, paprika en komyn oor. Lugbraai tot bros, sowat 5 minute.

3 Week die koeskoes in die rooibostee (kook die sorghum in water tot sag). Plaas in die mikrogolf vir 1 minuut en maak die koeskoes los met ’n vurk.

4 Voeg die groente en kekerertjies by.

5 Braai die spekvleis, indien gebruik, tot net gaar, kap fyner indien nodig en roer by die koeskoes in. Giet die slaaisous oor en laat afkoel.

6 Skep op in ’n platterige opdienskottel en sprinkel die koljanderblare oor.

Mengelslaai met piekelgemmer

Wilinda Hanekom van Moorreesburg is ’n raakvatvrou van formaat. Nie net is sy ’n formidabele spysenier nie, maar bedryf ook die dekorbesigheid, Swier. Tydens ’n lekker koffiekuier by haar huis hier op Langebaan het sy vir ons binne ’n japtrap hierdie slaai as ligte ete opgetower. Heerlik!

Genoeg v 4-6 mense

Bereiding; 15 min

Slaai

1 eiervrug, in blokkies gesny en in bietjie olie gebraai tot sag (opsioneel)

Iceberg-slaaikop, in repies gesny of 1 elk klein wit- en rooi kopkool, in dun-dun skyfies gesny

2 wortels, geskil en grof gerasper (opsioneel)

Halwe rooi ui, in klein blokkies gesny

Halwe komkommer, in blokkies gesny

1-2 appels, in skyfies of stokkies gesny

halwe pynappel, in blokkies gesny

Handvol koljander- en mentblare, gekap

Groot handvol boontjiespruite

Afronding

lemoenmosterdslaaisous (sien resep)

80 ml (⅓ k) piekelgemmer, fyngekap

groot handvol elk bosbessies en pekanneute vir bo-oor sprinkel

groot handvol uiesaadspruite

1 SLAAI Plaas die eiervrug in ‘n bak en giet van die slaaisous oor.

Meng al die slaaibestanddele in ‘n slaaibak en giet die slaaisous oor. Meng liggies deur, voeg ook die gemarineerde eiervrug by indien verkies.

2 Rond af met piekelgemmer, bosbessies, en neute bo-oor gesprinkel. Stapel die uiesaadspruite bo-op.

Lemoenmosterd-slaaisous

Lewer sowat 180 ml (¾ k) slaaisous

125 ml (¾ k) lemoensap

Sap en gerasperde skil van 1 suurlemoen

30 ml (2 e) olyfolie

2 knoffelhuisies, fyngedruk

15 ml (1 e) korrelmosterd

5 ml (1 t) Dijonmosterd

15 ml (1 e) heuning

45 ml (3 e) vars gekapte pietersielie, koljanderblare en ment

Sout en peper na smaak

1 Meng al die bestanddele saam en giet oor slaaie of hou in die yskas 1 x lemoenslaaisous (sien resep)

Lekkerste kaaskoek

Ek en my man hou daarvan om sommer partykeer net ’n koppie goeie koffie by ’n klein eetplekkie te geniet waar ons die mooi omgewing en die mense om ons kan gade slaan. Daarby bestel ons graag ’n snytjie kaaskoek, maar dit moet gebakte kaaskoek wees, nie te ryk nie en ook nie te soet nie. Ek het met velerlei resepte geëksperimenteer en hierdie een gemaak met geroomde maaskaas, en nie roomkaas nie, saam met jogurt is vir my net reg soos ons daarvan hou. Hier’s verskeie variasies hoe jy dit kan afrond. Die idee vir die heerlike pynappelsalsa bo-oor het ek by Yotam Ottolenghi afgekyk.

Kors

80 ml (⅓ k) bruinsuiker

250 ml (1 k) hawermout

50 g gekapte neute of pampoensade

60 ml (¼ k) klappermeel

Knippie bakpoeier en sout

80 g botter, gesmelt

1 eierwit

Vulsel

2 x 230 g gladde geroomde maaskaas (creamed cottage cheese)

250 ml (1 k) laevet natuurlike jogurt

25 ml (5 t) mielieblom

Sap en gerasperde skil van 1 suurlemoen

4 eiers

125-180 ml (½-¾ k) bruinsuiker of 60 ml (¼ k) elk versoeter en versiersuiker

Knippie sout

Bolaag

Halwe  pynappel, geskil en in stukke gesny

1,25 ml (¼ t) elk fyn kaneel en gemmer

30 ml 2 e)) bruinsuiker

7 ml (1½ t) elk suurlemoensap en water

pulp van 1 grenadella

1 cara cara-lemoen, geskil en in segmente gesny

Voorverhit die oond tot 120˚C

KORS Plaas die bruinsuiker, hawermout, neute, klappermeel, bakpoeier en sout in die voedselverwerker en kap goed fyn. Voeg die botter deur die tuit by en meng goed. Voeg die eierwit by en meng tot ’n deeg. Skep uit, vorm in ’n rol en verkoel verkoel so 10 min tot stewig. Sny in skywe en druk vas in ’n 23-cm losboompan – teen die boom sowel as die kant. Verkoel.

VULSEL Klits al die bestanddele saam tot net gemeng, nie skuimerig nie. Giet in die kors. Bak 1—1½ uur of tot die vulsel stewig maar steeds nog effe drillerig is. Skakel die oond af en laat in oond afkoel as jy tyd het.

BOLAAG Verhit die pynappelstukke saam met die speserye en suiker, suurlemoensap en water tot suiker gesmelt is. Koel af en meng die lemoenskyfies by. Skep oor die afgekoelde kaaskoek.

Variasies:
1 Kaneelsuiker

Vervang die pynappel-bolaag met appelskyfies (of heel klein appeltjies) wat effe gesoteer is in kaneelsuiker en bietjie botter.

2. Tweekleur-kaaskoek:

Meng die vulselbestanddele en deel in twee. Roer 60 ml (¼ k) kakao by die een deel in. Skep die wit deel in die voorbereide kors, gevolg deur die sjokolade. Bak soos beskryf.

3 Neutekaaskoek

Smelt bietjie suiker in ’n pan, voeg amandels of gemengde neute by en roer tot die amandels effe gekarameliseer is. Sprinkel oor die koek.

4. Bessiekaaskoek

Verhit 150 g bessies saam met sowat 60 ml (¼ k) suiker of versoeter en 30 ml (2 e) sterk bessie-rooibostee tot die bessies net sag maar nie stukkend gekook is nie. Spons 5 ml (1 t) gelatien in 30 ml (2 e) rooibostee en verhit tot gesmelt. Meng die bessiemengsel hierby in en skep oor die afgekoelde kaaskoek. Laat stol. Versier met ekstra vars bessies indien verkies. 

Lees ook: Carmen Niehaus se gesonder ontbytresepte uit Lekker & Goed

Stylvol

Handige ekstra wenke en raad, spesiale afslag en wenke, slegs vir die binnekring.

Jou e-posadres sal nie gepubliseer word nie. Verpligte velde word met * aangedui

Oor ons

Stylvol sosiale media

Nog Stories
goeie gewoontes
Kweek goeie gewoontes só
error: Content is protected !!