Klankterapie is ’n welweespraktyk wat al hoe meer aanklank vind by mense wat na nuwe uitwegte reik om van spanning ontslae te raak. ’n Klankterapeut vertel ons waaroor die (stille) bohaai gaan. Deur Suzanne Kotzé
Vroeër vanjaar word ’n volmaanswem, sauna-sessie en klankbad geadverteer by die getypoel waar ek gewoonlik swem. Enigiets met swem en ek is natuurlik daar. Ek het niks geweet van die sogenaamde klankbad en wat dit behels nie, en het ook nie veel verwagtinge gehad nie. Ek wou eintlik maar net saam met my vriendinne swem en in die sauna sit en gesels. Maar was ek nou aangenaam verras!
Ons het op die strand gelê terwyl klankterapeut Leandra Besters rondgeloop het en klokkies gelui het en later voor sangpotte gesit het en vibrasies voortgebring het, wat tot diepe tevredenheid gelei het. Ek het lanklaas so ontspanne gevoel.
Dit is amper soos mediteer sonder dat jy jouself die heeltyd hoef te herinner om nie aan goed te dink nie. Jy word so geabsorbeer deur die klanke en frekwensies dat jy nie regtig aan iets anders kan dink nie.
Jane Wurwand en haar liefde vir klankterapie
’n Paar maande later woon ons ’n funksie by waar Dermalogica stigter Jane Wurwarnd ook is. Sy vertel toe watter groot aanhanger van klankterapie sy is, en deel dat sy selfs haar eie klankkristalle en sangpotte het en met haar stemvurke reis omdat dit haar so kalmeer, veral na ’n besige dag.
As verrassing is daar vir ons ’n klankbad gereël, so tussen die pragtige kunswerke by die Norval Foundation, Kaapstad. En Leandra Besters is toe sowaar weer die klankterapeut.
En hierna moes ek net eenvoudig meer leer oor klankterapie, en wie beter om mee te gesels as die einste Leandra Besters, van Soundbath Cape Town.
Wat is klankterapie
Klankterapie is die gebruik van spesifieke klanke, frekwensies en vibrasies om emosionele, geestelike en fisieke welstand te ondersteun.
Klankterapie is gebaseer op die idee dat klank ons breingolwe, senuweestelsel en sellulêre gesondheid kan beïnvloed, wat ons help om van gespanne na ’n diep gevoel van ontspanning, teenwoordigheid en balans oor te skakel.
Klankterapeut Leandra Besters
Die voordele van klankterapie
Mense wend hulle dikwels tot klankterapie vir ontspanning, beter slaap, verminderde angs, beter fokus, emosionele vrystelling en pynverligting. Dit kan ook die liggaam se natuurlike genesingsprosesse ondersteun, stresvlakke verlaag en bydra tot diep rus en innerlike helderheid.
Verskillende metodes van klankterapie
- Klankbaddens (onderdompelende sessies met instrumente)
- Stemvurke vir vibrasie-akupunktuur
- Binaurale ritmes om breingolwe te verskuif
- Stemwerk of sang
- Musiekterapie (dikwels gelei deur ‘n gesertifiseerde terapeut)
Die vibrasie-resonansie tegniek
Vibrasie-resonansie is die kern van baie van Leandra se sessies. “Dit behels die gebruik van klankinstrumente, soos sangbakke, wat vibrasies skep wat nie net deur die ore gevoel word nie, maar deur die hele liggaam. Hierdie vibrasies kan help om die senuweestelsel te reguleer, die gees stil te maak en energieke belyning te ondersteun.
So werk ’n vibrasieresonansie-sessie
’n Sessie vind dikwels plaas terwyl jy gemaklik lê met toe oë. Die instrumente word in persoon in die kamer gespeel, soms naby of rondom die liggaam. Jy sal golwe van klank en vibrasie ervaar wat deur jou senustelsel beweeg. Baie mense sê hulle ervaar ’n diep meditatiewe toestand, emosionele vrylating of bloot ’n diep gevoel van kalmte. Elke sessie is anders en ontmoet jou waar jy is.
Die instrumente wat gebruik word
Instrumente sluit dikwels kristal- en Himalaja-sangbakke, stemvurke, klokkies, gongs en soms stem in. Elkeen bied ’n effens ander vibrasie en toon wat die liggaam en gees toelaat om op gelaagde, sagte maniere te reageer.
Klankinstrumente vir tuisgebruik
Baie mense gebruik klankskale, stemvurke of selfs klankgenesings-speellyste by die huis. Hou egter in gedagte dat terwyl tuisgebruik ondersteunend is, die effek van ’n werklike of begeleide sessie baie dieper kan gaan.
Wie kan klankgenesing beoefen?
Klank is ’n kragtige instrument, en terwyl enigiemand dit vir hul eie welstand kan verken, vereis die fasilitering van sessies vir ander behoorlike opleiding, bewustheid en verantwoordelikheid. Met die toename in gewildheid van klankterapie, is daar ook ’n toename in mense wat dit aanbied sonder ’n diepgaande begrip van die liggaam, senuweestelsel of die instrumente self. Dit kan lei tot ongemaklike of selfs skadelike ervarings. ’n Goed opgeleide klankpraktisyn sal weet hoe om veilig te werk, ruimte verantwoordelik te hou en hoëgehalte-instrumente te gebruik wat gestem en geskik is vir terapeutiese gebruik.
Betroubare klankhelers
Omdat klankterapie die afgelope paar jaar meer gewild geword het, is dit belangrik om ’n praktisyn met integriteit en behoorlike opleiding te kies. Soek iemand wat hoëgehalte-instrumente gebruik, hul benadering duidelik kan verduidelik en ruimte met sorg en sensitiwiteit behou, veral as jy met stres, trauma of gesondheidsprobleme te doen het. Persoonlike aanbevelings, die lees van getuigskrifte, die bywoning van’n groepsessie eers, of die voer van ’n kort gesprek vooraf kan jou help om ’n gevoel te kry of dit ’n goeie pasmaat is.
Hoe kan jy klankterapie tuis beoefen?
Jy kan begin deur ’n klankbak of ‘n klankgenesingsspeellys tydens meditasie of voor slaaptyd te gebruik. Selfs vyf minute se bewuste luister kan jou stelsel kalmeer. Stem (soos neurie of toning) is ook ’n kragtige instrument. Ek bied soms eenvoudige tuispraktyke of werkswinkels aan vir diegene wat dit wil verdiep.
