slimmer drankies
slimmer drankies

Vyf wenke vir slimmer drankies die somer

Hier is wenke vir slimmer drankies, want dis uiteindelik somer en of jy nou nog moet werk of nie, die vakansiegevoel hang dik in die lug. Omdat dit warm is, is ons ook geneig om meer vloeistowwe te wil drink. Dis wonderlike nuus vir ons hidrasie-doelwitte. Die slegte nuus is dat water dikwels nie die verkose drinkding is nie. Hier is vyf drinkgewoontes om dop te hou dié seisoen. Deur dieetkundige Liezel Engelbrecht

Alkohol

Oor die feestyd is dit maklik om meer alkoholiese drankies as gewoonlik te drink. Die gewoonte kan egter sy tol eis op jou gesondheid. Te veel alkohol oor die langtermyn kan skadelik wees vir jou lewer en hartgesondheid en ook jou slaapgewoontes beïnvloed. Dit kan dit ook moeilik maak om jou energie-inname te bestuur. Alkoholiese drankies is dikwels hoog in kilojoules.

Moet ook nie geflous word deur lae-alkohol of geen-alkohol wyn, mengeldrankies of bier nie: dit is dikwels steeds hoog in toegevoegde suikers of koolhidrate, en dus ook hoog in energie (hoewel daar ‘n paar uitsonderings is).

Natuurlik is laer alkohol inname oor die algemeen gesonder, maar probeer om dit nie te vervang met ander hoë-suiker alternatiewe nie. Baie alkoholdrankies en alkoholalternatiewe bevat nie voedingstabelle nie, so dis moeilik om te weet hoeveel suiker, of ander bestanddele, jy inneem. As daar wel ’n voedingstabel is, mik vir so min suiker as moontlik.

Drankies kan wissel van omtrent 300 kJ (sekere lae-alkohol biere) tot 3 000 kJ (mengeldrankies met baie alkohol, strope en koeldrankbyvoegings). Een glas 125 ml droë wit, rosé of rooiwyn is ongveer 400 tot 500 kJ, terwyl ’n “light” wyn ongeveer 300 kJ sal bevat per 125 ml. Dit kan egter baie wissel.

Slimmer drankies wenk 1: Wissel drankies af met vonkelwater

Wees slim en vat vonkelwater saam as jy uitgaan saam met vriende, en maak seker jou glas is heeltyd vol. Dikwels teug ons maar net uit gewoonte aan ons alkoholdrankie, en ons hou daarvan as ons glas vol lyk. Probeer dus om slukkies af te wissel met jou water, ook geskink in ’n mooi glas. As jy die gasvrou is, sorg vir ’n paar groot mooi glasbekers met water. Maak dit aantreklik deur gevriesde bessies, skywe appel, kruisement, lemoen of aarbeie daarby te voeg.

Gladdejantjies (smoothies) en drinkjogurt

Dis maklik om ’n botteltjie te gryp, of ’n gladdejantjie te koop sommerso vir die motorrit of ná gim, en dan daarvan te vergeet. Dis mos net ’n ‘gesonde’ drankie…

Wees egter bewus daarvan dat jogurtdrankies dikwels versoet is en hoog kan wees in versadigde vette as dit met volroommelk gemaak is. Gladdejantjies kan ook energiedig wees. Gesonde bestanddele soos vars vrugte, groente, neutbotter of gedroogte vrugte soos dadels is ’n pluspunt omdat dit vol voedingswaarde (vitamiene en minerale) is, maar onthou om die energiewaarde daarvan in ag te neem as jy jou gewig probeer bestuur.

Slimmer drankies wenk 2: Lees etikette

Lees etikette en kies opsies wat onversoet en laag in versadigde vette en suiker is. Jy kan ook jou eie gladdejantjies tuis maak as jy in beheer wil wees van die bestanddele. Dit hou goed vir minstens 2-3 dae in die yskas, so jy kan ’n paar gereed hê vir wanneer die lus jou beetpak.

Sap

Een glasie 250 ml sap kan tot 6 lepels suiker bevat. Sowat 125 ml sap kan gesien word as een ’n vrugteporsie, maar probeer om nie meer as dit per dag te drink nie. Hoewel sap steeds vitamiene en minerale bevat en dus ’n beter opsie as ander koeldranke is, kan dit jou bloedsuikervlakke steeds vinnig laat styg. Dit is ook meer energiedig as heel vrugte, omdat die reeds verwerk is. Eet eerder jou vrugte heel en behou die vesel.

Slimmer drankies wenk 3

Verdun sap met water of baie ys as jy dit graag drink.

Warm drankies

Baie van ons is lief vir ’n lekker cappuccino, Chai-tee of warm sjokoladedrankie, selfs in die somermaande. Onthou dat dié drankies ook dikwels hoog in vet en suiker kan wees – een so drankie kan selfs soveel energie as ’n sjokoladestafie bevat! Wees versigtig hiervoor as jy jou totale energie-inname dophou.

Slimmer drankies wenk 4

Vra vir vetvrye- of amandelmelk (beide is laag in vet), en vind uit of daar laer suiker Chai of kakao-opsies is.

Ystee, gaskoeldranke, energiedrankies en gegeurde water

Dié drankies bevat gewoonlik almal baie suiker. Ja, selfs gegeurde water. Met die uitsondering van ’n paar handelsmerke, bevat die meeste gegeurde water ook toegevoegde suiker. As dit by energie- en suikerbestuur kom, is dit beter om ’n kunsmatige versoete weergawe van jou gunsteling koeldrank of ystee te kies. Onthou egter om kunsmatige versoeter ook in matigheid te gebruik.

Slimmer drankies wenk 5

Maak jou eie gesonder ystee-koeldrank.

Vir 1,25 liter

  • Voeg 3 sakkies rooibostee by 500 ml kookwater.
  • Los 2 eetlepels heuning of 250 ml bessiesap daarin op
  • Laat dit afkoel
  • Voeg 500ml vonkel- of stilwater daarby.

Hoeveel water moet jy drink?

Volwassenes het ongeveer 20 tot 40 ml vloeistof per kilogram liggaamsgewig nodig vir die optimale funksionering van ons liggaamsfunksies. Jou behoeftes kan egter verskil, byvoorbeeld as jy baie aktief is, dit baie warm is, of as gevolg van sekere siektetoestande. Vir die meeste mense werk dit egter rofweg uit op ongeveer 6 tot 8 x 250 ml koppies vloeistof per dag. Probeer om die meeste van jou vloeistofinname van skoon, veilige water te kry. Behalwe vir al die ongesiene fisiologiese voordele, kan dit ook wondere verrig vir jou stoelgang, vel en eetlusbeheer.

  • Liezel Engelbrecht is ’n geregistreerde dieetkundige van Kaapstad. www.liezelthedietitian.com.
  • Besoek www.adsa.org.za vir ’n dieetkundige in jou area.
  • Vrywaring: Hierdie hulpbron is slegs vir opvoedkundige doeleindes en kan nie ’n individuele assessering of behandeling deur jou dokter of dieetkundige vervang nie.
Oor ons

Stylvol sosiale media

Nog Stories
mindful eating
Geniet jou kos, maar eet bewustelik
error: Content is protected !!