Gebruik dit wat jy reeds het en hierdie sakpasplanne om jou dekor op te knap; van blompotte verf tot meubels rondskuif. Kalinka Lombard van The Home Collective gee raad. Saamgestel deur Suzanne Kotzé
17/02/2023
The Home Collective se sakpas-dekorplanne
1. Verf ou blompotte
Gee ou blompotte nuwe lewe met hierdie verftegniek.
Benodighede
Ou blompotte, koeksoda, twee of drie verskillende neutrale kleure verf, klein sponsies, ’n kwas en paprika.
Doen dit so
1. Meng een teelepel koeksoda met een koppie verf. Dit laat die verf ’n effense korreltjierige/kleitekstuur kry.
2. Verf jou donkerste kleur eerste aan.
3. Druk dan ’n ligter kleur (ook met koeksoda gemeng soos a) bo-oor aan. Gebruik ’n ou stuk lap, T-hemp of selfs jou vingers om die effek van tekstuur te kry.
4. Smeer bietjie paprika hier en daar aan, om daardie effense, dog subtiele geroeste gevoel te kry. Moet dit egter nie oordoen met die paprika nie.
5. Laat dit droog word.
2. Ontklotter
Ons raak so gewoond daaraan om ons eie spasie te sien, dat ons dit later nie meer regtig sien nie. Na ’n ruk begin alle vertrekke ‘cluttered’ lyk. Kyk rond na wat onnodig is (oorvol boekrak, plante wat half dood is, te veel kussings op die bank) en gooi uit en pak reg.
3. Skuif dekoritems rond
Neem byvoorbeeld van jou eetkamer se dekoritems en stileer dit nuut in jou ingangsportaal. Die plante en kerse wat op jou eetkamertafel staan, kan dalk mooi lyk op die tafel in jou ingangsportaal.
4. Hergroepeer jou kunswerke
Skuif kunswerke rond in die huis. Hang dit in ’n nuwe groep (soos ’n art wall) of laat dit oorraam en nuwe lewe kry.
5. Gee jou huisplante ekstra liefde.
Knip dooie blare af of knip hulle terug. Spuit blare ook met ’n spuitbotteltjie en vee dit saggies met ’n lappie af om van stof ontslae te raak.
Besoek gerus thehomecollective.co.za
