Stof jou mooiste koekstaanders af en nooi jou vriendine vir ’n tuindag-teepartytjie. Vars blomme, gebak en lekkerlag saam met die girls is goed vir die siel. Deur Suzanne Kotzé, foto’s Tegan Smith,
06/10/2023
Om Tuindag, wat op Sondag, 15 Oktober val, te vier het ons Stylvol-vriendinne Rolanda Marais en Zoë Brown genooi vir ’n teepartyjie.
(Onthou, niks hoef perfek te wees nie. Jy kan so veel of so min moeite doen soos jy wil. Soms word ’n mens so oorweldig by die gedagte daarvan om alles te beplan en doen dat jy dit nie glad nie. As jy nie ’n bakker is nie, koop gebak en versier dit met mooi blommetjies of vra jou vriendinne om saam te bring. Die saamwees en kuier is die heel belangrikste.)
Wenke vir jou eie tuindag-teepartyjie
Vra jou vriendinne om tuinblomme saam te bring
Of, as jy baie blomme in jou tuin het, loop almal saam deur die tuin en pluk blomme vir tafel.
Tafelblomme
Rangskik die blomme sommer so half deurmekaar, asof jy dit net ingedruk het. Glaspotjies lyk modern en vars.
Meng oud en nuut
’n Room en swart linnetafeldoek skep ’n vars agtergrond vir outydse koekstaanders en moderne minimalistiese glas blompotte.
Soortgelyke glas koekstaander R360, Loads of living, beskikaar by Truworths
Versier met eetblare blomme
Of jy nou tuisgebak of gekoopte gebak bedien, eetblare blommetjies laat enige gebak indrukwekkend lyk en pas natuurlik by die tuinpartytjietema.
Dek ’n blommekroon vir elke gas
Of jy nou self wil blommekrone maak of laat maak (die meeste bloemiste kan dit vir jou maak), dek vir elke gas ’n blommekroon. Dit voel feestelik en spesiaal. Ons het hierdie jaar fyner blommekrone gekies om by ons ‘ou-wêrelds met ’n tikkie modern’ gevoel te pas.
Die ‘wow-oomblik’: aarbei-vonkelwyn-lollies
Sorg vir ’n showstopper met hierdie oulike aarbei-vonkelwyn-lollies wat jy in sjampanje coupés bedien en sjampanje bygooi.
So ’n tikkie spesiaal, laat jou gaste ook spesiaal voel. Van ons showstoppers op vorige tuindae was ’n gevriesde blomme ysbak (kyk hier) of ronde blomme ysballe.
Aarbei-vonkelwyn-lollies
Genoeg vir 8 lollies
2 glase sjampanje
2 koppies aarbeie (gevriesde of vars aarbeie)
2 eetlepels suurlemoensap
2 eetlepels suiker of xylitol (opsioneel)
Meng alles saam in ’n menger
Gooi in roomyshouertjies en vries oornag.
