Ouers, is jy ook al raadop met al jou kind se kunswerkies en pragtige tekeninge wat op elke liewe oppervlak in jou huis rondlê? In ’n poging om toonbanke klottervry te hou, druk jy die kunswerke in jou naaste kas, maar dit raak net elke dag meer. Ons ken hierdie gevoel en boonop wil ons (seker nes jy) ook ’n brandgevaar vermy! Hier is ses oulike planne vir jou kind se kuns, van uitstal tot stoorplekidees. Deur Justine Kroes
17/05/2024
1. Slim fotorame vir jou kind se kuns
Kyk net hoe slim is hierdie fotorame – ’n magnetiese deurtjie wat maklik oop en en toe maak, jy kan hiermee daagliks jou kind se kuns teen die muur verander. Die heel beste gedeelte is natuurlik die rekkie gedeelte agter laat jou toe om tot en met 150 A4 bladsye te stoor.
Akriel fotorame
Hierdie fotorame lyk modern en treffend en maak dit net so maklik om gereeld jou kind se kuns te ruil, skroef eenvoudig die voorkant los en vervang die prent, en skroef die boonste akriellagie weer terug.
Magnetiese fotorame
Vir nog ’n eenvoudige uitruilbare fotoraamidee – loer na hout magnetiese fotorame, jy knip jou kind se kunswerk tussen die twee houtrame in en hang dit op. Daar is verskeie oraloor beskikbaar – loer hier:
2. Koffietafelboeke
Hierdie is ’n opsie wat ons beslis gaan probeer – en The Bumble Box www.thebumblebox.co.za maak dit so eenvoudig.
Stap 1: The Bumble Box lewer ’n leë boks by jou huis af.
Stap 2: Vul die boks met jou gunsteling kuns, briefies, notas, feitlik enige iets wat jy graag wil onthou.
Stap 3: Die Bumble Bee-span met hul towerstaffies omskep ’n reuseboks vol kuns tot ’n pragtige (en kompakte) koffietafelboek.
Stap 4: Die boek (en oorspronklike kuns) word na jou toe teruggestuur en afgelewer. Werklik so maklik! (Jy kan kies of hulle die kuns moet terugstuur of nie)
Loer hier na die verskeie opsies vanaf R1 900 vir ’n 30 bladsy boek tot R5 200 vir ’n 200 bladsy boek.
Artsybooks is nog ’n Suid-Afrikaanse maatskappy wat ’n soortgelyke diens verskaf – loer gerus hier:
3. Skep ’n digitale versameling met jou kind se kuns
Dit mag dalk soos baie moeite klink – maar dit hoef nie te wees nie. Skep ’n aanlyn (dink aan jou huis – klottervry!) versameling van jou kind se kuns. Doen dit so:
Stap 1: vind ’n aanlynstoorplek:
Hoe of waar ookal jy aanlyn belangrike dokumente en fotos stoor, hetsy dit op die “cloud” of jou eenvoudige “Google-drive” is.
Stap 2: Gee dit ’n naam:
Skep ’n “folder” vir elke kind, daarin weer ’n “folder” vir elke jaar.
Stap 3: Skandeer, of selfs makliker, neem fotos van kunswerke, projekte, rapporte, en sertifikate. En laai dit eenvoudig in elke “folder”
Wenk: Hou ’n krat (in ’n kas wat kan toetrek) en plaas al jou kind se belangrike kunswerke, rapporte en sertifikate hierin. Neem dan een keer per maand tyd om behoorlik hierdeur te sorteer en fotos af te neem. Laai dan fotos op jou digitale versameling.
Om een keer per maand hierdie aan te pak mag dalk net vir jou minder oorweldigend voel.
Doen Dit Self Planne:
4. Knip dit vas
Hierdie lyk na ’n eenvoudige doen dit self uitstal plan. Gebruik twee tot drie (dun) houtplanke en maak dit onder mekaar teen die muur vas. Maak seker daar is genoeg spasie tussen die planke vir ’n kunswerk. Gebruik dan “clamps” en spyker of gom hierdie teen die hout vas. Siedaar – ’n maklike manier om jou kind se kunswerk uit te stal – sommer so ’n klompie langs mekaar.
5. Herwin ou rame
Kyk hoe vrolik lyk hierdie gallerymuur met ou rame.
Gebruik verskillende groottes en vorms rame en verwyder die glas en agterkant van die rame.
Besluit op ’n kleurskakering en verf al die rame dieselfde kleur. Of verskillende kleure wat ookal die beste werk in jou spasie.
Hang nou die rame met ’n gallerymuur effek in gedagte teen die muur op (die agterkant van die muur sal wys).
En plak dan jou kind se kuns in elke raam teen die muur vas.
6. Rame muurplakkers
Hierdie is ’n wonderlike idee vir ’n fokusarea in ’n speelkamer. Plak die “rame” muurplakkers op en plak jou kind se kunswerk binne die rame. Nog ’n manier om gereeld kuns te vervang.
