Die afgelope ruk loop ons sosiale media behoorlik oor van oulike kersplanne. Hier is van die idees wat ons gestoor en probeer het. En wat ons self vir Kersfees wil maak. Van drankies tot servette. Deur Suzanne Kotzé
Kersboom-servette
Met die eerste servetvou kos dit effens dinkwerk, en daarna is dit baie maklik om te vou.
Roosmaryntakkie servette
’n Maklike manier om servette mooi te laat lyk, is om net ’n roosmaryntakkie op ’n servet te sit. Dit lyk ook soos ’n kersboompie.
Kersdrankies
“Snow globe’ jenewer en tonikum
Hierdie het omtrent die sosiale media aan die gons gehad, dis maklik, lekker en lyk indrukwekkend.
Vul ’n glas met ’n bietjie gefiltreerde water. Meet ’n roosmaryntakkie en knip dit net korter as die glas. Laat die takkie regop binne die water staan en vries.
Gooi jenewer en tonikum in. Dit proe net so lekker met nie-alkoholiese drankies of met net tonikum ook.
NS: terwyl die water besig is om te ys, kyk dat jou boompie nog regop staan. Help hom om weer regop te kom as hy skeef geval het.
Ysballe
Jy het waarskynlik al die blomweergawe van hierdie ysballe op Stylvol gesien. Ons gaan beslis hierdie vir Kersfees probeer.
Lees gerus hier hoe om dit te maak. Gebruik groen kruietakke en rooi blomme soos rose vir die Kersweergawe.
Bessies-en-takkies-ysbak
Die blomweergawe hiervan het jy ook waarskynlik op Stylvol gesien. Gebruik rooi bessies en groen kruietakke in plaas van blomme. Kyk gerus na ons Instagram reel hoe om dit te maak.
Muffinpan-ys
Hierdie is ’n maklike manier om drankies of waterbekers indrukwekkend te laat lyk. Vries jou gunsteling vrugte en kruie in muffinpannetjies. Van ons gunsteling kombinasies is: framboos en roosmaryn of granaat en kruisement. Pomeloskywe in die ys gevries is heerlik vir jenewer.
Groot ysblokkies met bessies en kruie
Deesdae is groot silikoon ysbakkies oral te koop. Ons het onlangs by Checkers aangeskaf. Granaat en kruie is die Kerswennerweergawe.
Wynbottels met kerse en kruie
Deursigtige wynbottels gevul met water en bloekomtakkies en kerse skep ’n pragtige gestroopte Kersatmosfeer.
Versnaperinge
Kersboompitas
Sny ’n pitabroodjie in agt (soos ’n pizza). Smeer hoemoes (ons het gekaramaliseerde uie- hoemoes gebruik) bo-op. Kap kruie fyn(mengsel van kruisement, pietersiele en koljander) en doop die broodjie hoemoes kant bo in die fyngekapte kruie. Sprinkel granaatpitte bo-op. Dit is ’n heerlike happie!
Pesto skilferkorsboompies
Verf ’n rol skilferkorsdeeg alkante met pesto. Sny in repe van omtrent 2cm. Gebruik sosatie-stokkies en ryg die deeg daardeur om kersboompies te vorm.
Bak in die oond vir so plus minus 10-15 minute teen 180 grade. Draai die boompies halfpad deur die tyd om. Moenie oorhaastig wees nie, jou deeg moet goed gaar wees en mag dalk selfs langer nodig hê. (Rou skilferkorsdeeg is nie juis lekker nie!)
