Glansende vel, ‘blurred lippe’ en waterkleur wange is van ons gunsteling lentegrimering. As jy wonder watter grimering saam met die seisoen se modes gaan, lees gerus hier. Deur Suzanne Kotzé
‘Blurred’ (vervaagde) lippe
Hierdie is seker een van die grootste grimeertrends. Hierdie moeitelose mooi ‘blurred’ voorkoms is op die oomblik ’n groot trend as dit by alle lipkleure kom. Dink aan lippe wat lekker lank gesoen is, of na jy rooi wyn gedrink het.
Lipstiffie moet lyk asof dit effens ingedra is en jy dit sommer maar so aangesmeer het, en nie ure spandeer het om die perfekte buitelyne te trek en in te kleur nie.
Lipvlek en lipolies is ideaal om die voorkoms te skep.
Die ‘nuwe’ rooi
Met tamatierooi wat ’n groot modekleur is, is dit geen wonder dat rooi lippe weereens ’n oomblik in die kollig geniet nie. Die koel manier om die klassieke staatmaker op die oomblik te dra is minder skerp en perfek en meer sag, effens glansend met kleur wat vervaag (blurred) is.
“Wend ’n bietjie lipbalsem aan jou lippe aan en wend rooi lipstiffie net aan die middel van jou lippe aan en gebruik dan jou vingers om dit liggies uitwaarts te smeer,” is grimeerkunstenaar Cheryl Parker se raad.
Onthou om altyd eers jou lippe af te skilfer voordat jy enige helder kleur dra. Grimeerkunstenaar Renée de Witt sê: “Ek skilfer altyd eers die lippe af deur lipbalsem te gebruik en van daardie weggooibare maskaraborseltjies (waarmee jy ook jou wenkbroue kan opkam). Wend die lipbalsem aan en borsel saggies oor jou lippe met die borseltjie.”
Pienk, maar maak dit monochromaties
Van borrelgom tot meer perskekleurige pienk lippe, oë en wange! sê beslis lente. Jy kan dit of aantik aan jou lippe met jou vinger om ’n sagter, gevlekte en ‘blurred’ gevoel te kry, of die meer sappige, glansende pienk weergawes doen deur ’n lagies glans bo-oor jou lippe aan te wend. ’n Alles in een blosser wat jy ook aan jou lippe en ooglede kan tik is ideaal vir die monochromatiese voorkoms.
Jy kan selfs heeltemal monochromatiese gaan en dit saam met die seisoen se stofpienk modes dra.
Waterkleur wange
Soos die ‘blurred’ lippe, lyk wangkleur vir die lente ook sagter. (Ligte) laag op laag is die antwoord hier. Begin met ’n ligte lagie room of jel blosser (wat lyk asof dit soos waterverf deurskyn) en tik ’n ligte bypassende poeierblosser bo-oor.
Glansende vel
Glansende vel is elke lente weer ‘in’ en hierdie seisoen is geen uitsondering nie. Dit is vir eers tyd om jou poeier en mat onderlaag te bêre vir die winter (tensy jy natuurlik ’n baie olierige vel het). Trek gerus jou glansende ‘primer’, onderlaag en verbronsingpoeier nader.
Mikro-oogomlyner
Hierdie is makliker om aan te wend as tradisionele vloeibare oogomlyner. Trek ’n fyn strepie so na as moontlik aan jou ooglid en wip dit uitwaarts. Lees gerus ons vloeibare oogomlynerwenke hier:
Wenk: As jy regtig sukkel, lig jou wimpers op en trek die strepie aan die binnekant van jou wimpers en wip dit net aan die buitehoek op.
