Geskenk-idees vir ‘Secret santa’ of ‘Yankee’ geskenkuitruil (en hoe speel jy dit?)

Of jy hierdie nou wil doen vir ‘Friendsmas’ of saam met kollegas of jou familie op Kersdag, hier is die idees vir ‘Secret Santa’ of ‘Yankee’ geskenkuitruil. Deur Suzanne Kotzé

‘Secret Santa’

Hierdie werk gewoonlik goed as julle as familie of kollegas nie vir almal geskenke wil koop nie. Gewoonlik is dit kleiner (goedkoper) tipe geskenke, maar jy kan die begroting natuurlik enige iets maak wat jou gaste pas. Almal trek lootjies met ’n persoon se naam op en jy weet nie wie jou naam getrek het nie. Sommige mense verkies dat elke gas ook ’n wenslysie gee (wat binne die begroting pas). Die toegedraaide geskenke het geen name op nie, en wanneer jy jou geskenk oopmaak, moet jy raai wie dit vir jou gegee het.

‘Yankee’ geskenkuitruil

Hierdie speletjie word ook ‘Dirty Santa’ of ‘Yankee Doodle’ genoem en is ’n wonderlike ysbreker. Daar word baie gelag met die een! En geskenkies hoef nie duur te wees nie. ’n ‘Snaakse’ geskenk of twee sorg vir ekstra lag.

Speel dit so.

Vra vir elke gas om ’n toegedraaide geskenk (sonder name op) te bring. Dit werk goed om ’n begroting te gee.
Sit almal se geskenke waar dit sigbaar is, byvoorbeeld op die tafel waar julle sit, of op ’n klein tafeltjie langs die tafel, op ’n koffietafel ens.
Laat gaste lootjies trek met nommers op.
Die gas wat nommer een trek kan ’n geskenk kies (maar nie die geskenk wat hy/sy gebring het nie) en dit oopmaak en vir almal wys.
Die persoon wat nommer twee trek, kies ’n geskenk en maak dit oop. Hulle kan dan besluit om dit te hou of om dit te ruil met enige iemand anders wat reeds hulle geskenk oopgemaak het.
Geskenke word oopgemaak en geruil tot elkeen ’n geskenk het.
Laastens kry nommer een die beurt om sy/haar geskenk om te ruil.