Volg dié wenke vir fyn hare en keer dat jou hare heeldag pap hang of vasgepleister teen jou kop sit. Deur Suzanne Kotzé
Onthou fyn hare is nie gelyk aan dun hare nie. Dit het te doen met hoe dik of dun ’n enkele haarskag is en dit kan reguit of krullerig wees.
Beste wenke vir fyn hare
1. Was jou hare op die regte plek
Fyn reguit hare is geneig om makliker vuil te word. Konsentreer daarop om jou kopvel te was en los jou punte.
2. Kies sjampoe wat volume gee
“Die regte sjampoe (en opknapper) is jou eerste stap om jou fyn hare voor te berei. Hou by sjampoe wat volume gee,” is Nastassia Viljoen van Tosca Salon se raad.
3. Moenie te veel skrop nie
Gebruik jou vingerpunte om jou kopvel te was, maar wees versigtig om te veel te skrop, want dit kan jou kopvel oormatig stimuleer om nog meer olie te maak. Fyn hare koek ook makliker, dit is beslis nog ’n rede om eerder sagkens te was.
4. Opknapper net aan die punte
Wend opknapper slegs vanaf die middel van jou hare tot by die punte aan. “En onthou ’n teelepel-grootte professionele opknapper of ’n eetlepelvol winkel- opknapper is genoeg. Te veel opknapper kan jou hare laat pap hang,” sê Shelene Shaer van Tanaz Hair.
5. Spoel jou hare goed af
Ons is dikwels te haastig met afspoel en oortollige opknapper of sjampoe kan jou hare gouer laat vuil lyk en pap hang.
As jy dink jy het genoeg gespoel, spoel weer.
6. Moenie te veel borsel nie.
Kam jou hare om koeke uit te kry, maar wees versigtig om jou hare te veel te borsel, want dit kan jou kopvel meer olierig maak. Het jy fyn krulhare, weet jy waarskynlik reeds dat te veel borsel jou hare soos ’n leeu se maanhare kan laat lyk.
7. Blaas kop-onderstebo droog
As jy lang hare het, kan jy ’n borsel met ’n plat spaan (paddle) gebruik om jou hare van jou kopvel tot by die punte (steeds kop-vooroor) droog te blaas. “Wanneer jy klaar is, hou jou kop nog sowat tien sekondes lank onderstebo sodat jou hare koud kan word, of blaas dit met jou haardroër op sy kouelugstelling,” is Shelene Shaer van Tanaz se raad.
8. Los jou hare om jou borsel
Skaf ’n ekstra ronde borsel of twee aan en los die borsels teen jou kopvel nadat jy dit klaar drooggeblaas het. Stel jou haardroër op koud en blaas oor die borsels.
9. Stilering: minder is meer
Te veel stileerprodukte maak jou hare swaar en laat hulle plat hang. Begin met minder eerder as meer en gebruik liewer later nog ’n bietjie indien nodig.
10. Vermy serums met ’n oliebasis
“Serums kan fyn hare olierig laat lyk. Kies eerder ’n sproei soos ghd Final Shine Spray (R280) of Redken Frizz Dismiss Anti-Static Oil Mist (R580) om opwiphaartjies in toom te hou,” is Nastassia se raad.
Nog ’n goeie wenk vir opwiphaartjies is om haarspoei op jou kam of vingerpunte te spuit en liggies oor die opwiphaartjies te vee.
11. Kies stileerprodukte wat jou wortels lig
“Gebruik mousse of ’n sproei wat die wortels lig op jou wortelarea,” sê Nastassia.
12. Gee tekstuur aan jou hare
Skep meer tekstuur met produkte soos droë sjampoe, seewater-spuitmiddels of ‘taai’ poeiers.
13. Krul jou onderste laag hare vir ekstra volume
Krulle is wonderlik vir volume. As jy egter nie die gekrulde voorkoms wil hê nie, lig die boonste deel van jou hare op en krul net die hare daaronder. Gooi dan die boonste hare weer bo-oor die gegolfde dele.
14. Pluiskam vir ekstra volume
Jy kan jou hare ook effens pluiskam, maar onthou daar is ’n fyn lyn tussen “groot hare” en volheid. . Moet nooit die boonste/buitenste laag van jou hare pluiskam nie. Bind die boonste hare weg en pluiskam die hare net daaronder. Laat sak dan jou boonste hare bo-oor en spuit liggies met haarsproei.
15. Verander jou paadjie
Verander jou paadjie elke nou en dan. Jou hare leer met die tyd om platter te lê waar jou paadjie is. Deur jou paadjie op ’n ander plek te dra, kan jy meer volume kry.
16. Blond kan beter wees
Blonde kleursel of bleikmiddel droog jou hare uit, maar verleen ook meer volheid aan fyn hare.
17. Wees versigtig vir te veel lae
In plaas van lae dwarsdeur jou haarsnit, vra jou stilis om eerder net lae of tekstuur aan die boonste laag te gee,” is Nastassia se raad.
18. Kort style is ’n goeie opsie.
“Afhangend van hoe fyn jou hare is, is dit dalk beter om jou hare kort te hou,” is Danita Pendelbury van Tosca Salon se raad.
19. ’n Permanente golwing is ook ’n goeie opsie
’n Sagte permanente golwing (of perm soos baie van ons dit ken) kan ’n goeie opsie wees vir volume. Jy hoef nie stywe krulletjies te hê soos in die tagtigs nie, eerder groter sagte krulle.
20. Hande uit jou hare
Vat so min moontlik aan jou hare. Fyn hare is geneig om olierig te wees en as jy te veel daaraan raak, is dit kort voor lank nog meer olierig.
