Hier is dekoridees vir ’n snoesige winterhuis, reg vir kuier, bordspeletjies of luilekker opkrul op jou bank, want dit is immers hiberneerweer. Deur Suzanne Kotzé
Skep jou snoesige wintershuis só
1. Strooikussings met tekstuur
Daar is tans soveel strooikussings met tekstuur in die winkels; van bouclé tot kunspels. Dit is ’n maklike manier om jou dekor dadelik meer snoesig te laat voel. Onthou om sponskussings met verekussings te vervang; dit skep dadelik ’n luukse gevoel, en vere vorm ook mooier. Loer gerus by Hertex Haus hiervoor.
2. Kombersies in jou leefarea
Vervang gerus jou kombersies elke nou en dan. Die sagste kombersies word wollietjiesrig en lelik. Skenk dit gerus vir ’n projek vir haweloses. Kombersies vir die winter moet natuurlik streelsag en vertroetelend wees. Maak seker dit pas in by jou dekor se kleurskema. Wenk: hoekom nie vir elke familielid ’n verskillende kleur kombersie gee (wat natuurlik by die kleurskema inpas) nie.
3. Skep atmosfeer met kerse
Verby is die dae wat ons net lang of ‘pillar’ wit kerse gekry het; kies kerskleure en vorms wat by jou dekor pas. Onthou ook om met hoogte en tekstuur te speel. Dink aan ’n vet kers op ’n kleiteëltjie saam met ’n lang kers in ’n koperkandelaar.
NS Die Nederlanders het ’n lieflike gewoonte; borreltijd. Om 5 uur steek hulle klokslag kerse aan en sit ’n paar versnaperinge uit en geniet iets om te drink. Dit hoef natuurlik nie alkoholies te wees nie.
4. Geur jou huis warm met warm, speseryerige geure
Die antieke Grieke was glo eerste om geurverspeiders te gebruik in die vorm van riete wat hulle in essensiële olies gedoop het en gebruik het om hul huise en tempels mee te geur. Vandag kry ons natuurlik selfs elektroniese geurverspreiders.
Ons het selfs onlangs hierdie mooi Fester tafellamp gesien (hoog op ons wenlysie, maar ons sien dit nog nie in Suid-Afrika nie).
Kies warm en uitnodigende geure soos vanielje of naeltjies vir kerse of geurverspeiders. Nog goeie geure vir jou huis:
- FRANGIPANI (plumeria) word met vrede en harmonie vereenselwig.
- PATSJOELIE verbeter jou bui en beveg depressie
- SEDERHOUT snoer mense saam
- SALIE word vanaf antieke tye gebruik om van negatiewe energie ontslae te raak.
5. Stal jou kaggelhout uit
Maak jou kaggelhout deel van jou dekor, daar is soveel mooi verskillende houers om kaggelhout in te stoor. Bêre gerus daardie lelike, halfgebrande mandjie waarin jy jou kaggelhout rondkarwei.
Firewood Holder – Indoor (R1 549, Pedersen & Lennard)
Kaggelhoutspirasie
Foto’s: Pinterest
6. Dek met ’n tafeldoek
Verruil gerus jou plekmatjies vir ’n tafeldoek wat lekker lank afhang en ekstra drama en atmosfeer skep. Kies grofgeweefde linne vir ekstra tekstuur.
7. Verander jou beddegoed
Winterlakens bly een van die maklikste maniere om jou dadelik meer snoesig te laat voel. Onthou gerus ook om eers laaswinter se kombers wat in die kas weggepak was, in die son uit te hang, voordat jy daarmee bedopmaak. Die sonlig help om huisstofmyt te vernietig.
8. Bring warm, aardse kleure in
’n Warm, aardse kleurpalet is ’n goeie opsie vir die winter. Bruin word juis as die winter se nuwe neutrale kleur bestempel.
9. Kies klei
Bêre jou glas uitstal-elemente en kies die growwer tekstuur van klei; van blompotte tot kershouers.
10. Sagte lae lig met lampe
Staan of tafellampe skep ’n uitnodigende, koesterende gevoel. Kies spasies soos hoeke waar dit dalk van nature donker is. Onthou om altyd warm gloeilampe by staanlampe te gebruik.
11. Speletjiesaand
Winter is die ideale tyd vir bordspeletjies, maar die meeste van ons se bordspeletjies is so diep in ’n kas weggebêre dat ons daarvan vergeet. Kies ’n paar mooi bordspeletjies en stal dit op ’n rak uit, sodat dit maklik bereikbaar is.
Foto: Style Curator, Pinterest
12. ’n Spasie vir modderskoene
Moenie van ’n skoenrakkie of matjie by jou voordeur vergeet, waar vuil modderskoene uitgetrek kan word nie.
13. Kapstok of jashakke
Hake of ’n kapstok lyk nie net mooi by by jou voordeur nie, en is nie net prakties vir jou gesin nie, maar ook vir kuiergaste. Hoeveel keer plak jou gaste nie net hulle sakke en serpe op die naaste tafel of bank neer nie.
Black Epoxy Steel Coat Stand with bench (R10 290, lim.co.za)
Hatch Coat Rack (R2 299, Iconomy)
