Waarskuwing; jy gaan waarskynlik jou hare wil laat waai nadat jy van hierdie haarstyle gesien het. Van die Riviera tot die bixie, pixie en vele meer. Hier is ‘knipspirasie’ vir jou volgende salonbesoek. Deur Suzanne Kotzé
Hierdie haarstyle is groot nuus in 2025
1. Die Riviera bob
Hierdie bob word die ‘Riviera bob’ genoem omdat Sofia Richie haar hare geknip het terwyl sy met vakansie was in Frankryk.
“Dink aan die klassieke Franse bob, maar met golwe in ’n S-vorm,” sê Kaapse haarstilis Charles-Junior Louw. “Pamela Anderson het ook op die oomblik hierdie styl.”
2. Kort krullebob in karamelskakerings
Natuurlike tekstuur en krulle is altyd mooi, en Halle Berry se karamelkleur beklemtoon dit.
3. Die Franse bob
Hierdie klassieke styl sal nooit uit die mode gaan nie.
4. Die Bixie
Die Bixie is ’n mengsel van die bob en pixie en is so vier jaar gelede deur haarstilis Briana Cisneros bekend gemaak en is steeds baie gewild.
“Hierdie styl is ideaal vir die tipe persoon wat hou van ‘razor cuts’. Dit is ook belangrik dat jy daarvan hou om jou hare te stileer, want die styl (wat punterig geknip is) kan maklik slierterig lyk as jy dit nie reg stileer nie. ’n Vinnig krultang, net by jou punte, werk gewoonlik goed,” is Junior se raad.
5. Die pixiesnit
Vanjaar is die pixie, in al sy gedaantes, van die klassieke pixie tot by die moderne, sagter weergawe met meer tekstuur, tot die ‘gamine’ (seunsagtige) pixie, beslis in.
Emma Stone se ondersnit pixie by hierdie jaar se Golden Globes het sjiek, minalisties en modern gelyk.
6. Die stomp (blunt) bob
Die stomp bob is ’n reguit gesnyde snit, sonder enige lae wat enige lengte bo jou skouers is. Dit skep ’n sterk, skoon silhoëet wat aandag trek. “Hierdie tipe snit werk veral goed om fyn hare dikker te laat lyk,” sê Junior.
7. Krulle
Krulle bly groot nuus, en so ook snitte wat met die natuurlike haartekstuur werk. Van lobs, tot bobs.
8. Die Mikro bob
Die weergawe van die bob is kort en word beskryf as die meer moderne weergawe van die Franse bob. Die styl kan met of sonder ‘n kuif wees.
Negentigs snitte
8. Skoenlappersnitte
Dit skoenlappersnit het baie lae, met korter stukke rondom jou gesig en kan enige lengte wees, van lank tot lob of bob.
Foto: Kort skoenlappersnit. @Laura_pumiliahair Instagram
9. Die Wofsnit
Dink aan ‘shaggy’ lae gemeng met ’n mullet in verskeie lengtes, meestal met ’n 90’s ondersnit daarby.
11. “Shaggy’ gelaagde snit
Of dit nou ’n ‘shaggy’ bob of ’n ‘shaggy’ kort styl is, lae en tekstuur is groot nuus. “Die ‘shaggy’ gelaagde snitte gemeng met die ‘mullet’ is ook tans baie gewild,” vertel Junior. Die style gee ’n rock ’n roll gevoel en werk veral goed as jy fyn hare het, of ’n effense golf.
12. Die supermodel lob
jacobschwartzhair Instagram
Die gewilde “supermodel lob”-haarstyl vir 2025 is ’n langer bob (lob) haarstyl wat tekstuur en volume beklemtoon, dikwels gestileer met ‘n 90’s-geïnspireerde flip.
