Dit is die mooiste tyd van die jaar vir piekniekhou. Of jy nou ’n oggend, middag of sonsondergang-piekniek beplan, hier is alles wat jy nodig het om dit te geniet. Deur Suzanne Kotzé
1. Beplan vir die perfekte piekniek
Maak vooraf seker oor die reëls van waar jy gaan piekniek hou.
- Mag alkohol gebruik word? (of moet jy dit dalk oorweeg om drankies oor te gooi in ‘koeldrankbottels?).
- Hoe vêr se loop is dit (en hoe swaar wil jy dra?)
- Is daar dromme?
- Mag jy musiek speel?
2. Begin met ’n groot-genoeg en gemaklike basis.
’n Groot piekniekkombers (verkieslik waterbestand onder) is ’n moet. Onthou jy wil gewoonlik bene uitgestrek sit en gemaklik wees, so groter is beter as dit by jou piekniek-kombers kom.
Bring ’n paar ekstra kussings of serpe om op te sit as die grond ongelyk of hard is.
3. Rugstoeltjies sorg vir ekstra gemak
Daar is deesdae die allermooiste piekniekstoele beskikbaar. Plat op die vloer met ’n kussing en ruglening is ideaal vir piekniek.
Wenk: kry ekstra gebruik uit jou piekniekstoel deur dit te gebruik op ongemaklike, harde sportpawiljoene.
4. Drasak of piekniekmandjie
Of jy nou ’n drasak of piekniekmandjie verkies, maak seker jy kies een wat gerieflik dra en nie net mooi lyk nie.
5. Gerieflike opslaantafeltjie en glashouers
’n Opslaantafeltjie (veral een met gaatjies waarin jy jou glase kan hou) help vir minder mors (en veral glase wat omval).
6. Pak kos in herbruikbare houers
Ons weet dit is gerieflik om piekniekkos sommer net so in die houers te neem waarin jy dit gekoop het. So dikwels bly kos oor en dan is die plastiekbedekking af en dan moet jy oorskietkos weggooi. Wees op die uitkyk vir herbruikbare houers (wat natuurlik by jou kleurskema pas).
7. Moenie van die nodighede vergeet nie
Behalwe borde, glase en messegoed, onthou ook van ’n skerp snymessie en plankie.
8. Praktiese koelsakke
Ja ons weet ’n Fieldbar is ’n piekniek status-ikoon. Maar ’n ligter koelsak, waarin jy meer kan inpas (vir veral jou kas) is ook nodig. Kies gerus een op wiele as julle verder moet stap.
Wenk: vries bottels water vooraf; dit hou kos koel en verdubbel as koue drankies later.
9. Skoon hande (en omgewing)
Onthou die klein noodsaaklikhede: borde, koppies, glase, servette, eetgerei en ‘n klein kapmessie en plankie. Handskoonmaaklappies en ’n swart sak/plastieksak vir vullis. Onthou om niks agter te laat nie. Sommige piekniekplekke is dromvry (so jy moet dikwels jou vullis huis toe neem.)
10. Wees weer-gereed
Onthou sonbrille, hoede, sonskerm en warmer baadjies of serpe. Die weer kan onvoorspelbaar wees, en dit word dikwels vinnig koud wanneer die son ondergaan. Groot ligte serpe is veral wenners, want jy kan dit gebruik vir ekstra sitplek, as ’n kombersie of natuurlik om jou nek of selfs om jou hare as die wind waai.
11. Tikkie romanse met beligting
Voeg ’n tikkie romanse by met mooi liggies. Dit is ook prakties, want ’n sonsondergangpiekniek verander blitsig in pikdonker, veral in die natuur.
