Ons gaan self hierdie vakansie-haarsorgwenke moet gebruik. Tyd in die son en swem, is beslis waarmee ons ‘n lekker Desembervakansie assosieer, maar dit is nie altyd die beste vir ons hare nie. Deur Suzanne Kotzè
02.12.2022
Haarkappers steek maar te gereeld voor en na somervakansie vir ons preke af, want ons spandeer soveel tyd en geld aan ons hare, net om met droë hare terug te kom van vakansie af.
Beste vakansie-haarsorgwenke
1. Maak jou hare met kraanwater nat voordat jy swem.
Hierdie is een van die beste wenke wat ek lank gelede nog by Shelene Shaer van Tanaz Hair gekry het. Jou hare is soos ’n spons en as dit klaar vol kraanwater is, sal dit minder swembadwater kan absorbeer.
2. Kies salonprodukte
“Maak altyd seker jy gebruik die regte salonprodukte wanneer jy jou hare versorg.
Professionele haarprodukte bevat die regte bestanddele om jou hare genoeg vog en proteïene te gee,” is Francois van der Walt, Tosca Salon, Tygervallei se raad.
3. Sit vog terug met ’n masker
Sout- en of chloorwater droog ons hare vreeslik uit. “Gebruik ten minste een of twee keer per week ’n bevogtigende masker vir jou hare,” sê Francois.
4. Spoel jou hare af na swem
Francois sê: “Sodra jy klaar geswem het, spoel jou hare af met skoon water of sjampoe as jy kan. Dit sal sal verhoed dat die hare uitdroog of groen raak.”
Ons het onlangs hierdie Label.m Sun Edition After Sun Cleanser (R160 vir 60ml, haircare.co.za) ontvang en dit bly sommer in die strandsak. Ek probeer soms om sommer by die strandstort gou hare ook te was. Baie keer gaan ’n mens nog iewers anders heen na ’n stranduitstappie en dan sit jy heeldag met hare wat droog word. Die sjampoe beskerm ook jou hare teen UV-strale en help dat jou kleur mooi bly.
5. Beskerm jou kleur met ’n spesiale sjampoe en opknapper
Gebruik ’n sjampoe wat vir gekleurde hare bedoel is. Jy kan ook ’n “lock-in leave-in spray conditioner” gebruik voordat jy begin hare droog maak,” beveel Francois aan. Francois se gunsteling is Schwarzkopf Professionals Color Freeze Spray Conditioner (vanaf R365, by uitgesoekte salonne).
6. Tref voorsorg
“Om te keer dat jou hare uitdroog as jy swem, wend haar-olie soos Schwartzkopf Professional Barbary Fig oil (R460, uitgesoekte salonne en labelle.co.za) aan voor jy swem,” sê Francois. Dit help ook keer dat jou hare koek.
Ons wenk: As jy nie haar-olie het nie, kan jy ook ’n ‘leave-in conditioner’ gebruik.
7. Maak ’n hoë bolla
Justine hou nie daarvan dat haar hare en haarverlengings nat word nie, en maak gewoonlik ’n hoë bolla.
8. Druk jou hare liggies droog
As jy nie jou hare kan afspoel nadat jy geswem het nie, druk dit liggies droog sodat jy soveel moontlik van die swembad of seewater uit jou hare kry. ’n T-hemp werk wonderlik hiervoor (pleit onskuldig as jou man wil weet hoekom sy T-hemp so nat is)
9. Inbly opknapper
Spuit ’n hidrerende inbly opknapper (leave-in conditioner) in nadat jy geswem het.
Probeer
10. Neem ’n breek van hitte-stilering
Pak weg jou haarysters en krultange en gee jou hare ’n hitte-breek. Jou hare is waarskynlik reeds meer droog en hitte-stilering sal net nog meer skade aanrig. Werk met jou hare se natuurlike tekstuur vir ’n ontspanne vakansie-voorkoms.
