Helderkleurige bykomstighede; dra dit so

Hierdie seisoen is daar nie ’n tekort aan helder skakerings in die modewêreld nie – van loopplanke tot trendy street style uitrustings is dit duidelik – helderkleurige bykomstighede is groot nuus, en ons verstaan hoekom. Kleur is ’n onmiddellike gemoedsversterker. Van fuschiapienk skoene tot neongeel handsakke – voorkomskonsultant Susra Matthee deel wenke oor hoe om hierdie trend soos ’n modekenner foutloos aan te pak. Deur Justine Kroes

25/06/2022

Wenke om jou helderkleurige bykomstighede te stileer

Voorkomskonsultant en kleurkenner Susra Matthee se wenke vir helderkleurige bykomstighede

1. Dra dit monokromaties

Anders as onlangse seisoene – waar meestal botsende helder skakerings gesien was – is monokromaties (skakerings van dieselfde kleur) hierdie seisoen ook groot nuus. Jy kan ’n blou handsak of skoene by ’n blou broek, baadjie en hemp in verskillende skakerings dra.

Country Road Recycled Polyester Crossbody Bags (R699)

2. Vergeet van ou modereëls

Dit is immers nie die einde van die botsende kleure nie en onthou daar is nie meer reëls as dit kom by kleure meng nie. Pienk en rooi, pers en sonskyngeel, groen en kobaltblou—die opsies is eindeloos.

Jy hoef ook nie te voel jy moet die helderkleurige bykomstigheid by iets anders in jou uitrusting te laat pas of die kleur weer te herhaal nie.

3. As jy huiwer kies komplementêre skakerings

Dit bly wel wys om jou komplementêre (kleure oorkant mekaar op die kleurwiel en analogiese kleure (lanks mekaar op die kleurwiel) in ag te neem. Komplementêre kleure sal mekaar helderder laat vertoon. Indien jy baie blou dra, is ’n oranje handsak ’n goeie opsie – die twee kleure sal mekaar komplementeer (blou en oranje is oorkant mekaar op die kleurwiel) Dit gee jou ook die kans om iets oranje in jou kas te hê, indien dit ’n kleur is waarin jy nie gewoonlik goed lyk nie, aangesien dit nie naby jou gesig gedra word nie.

Jy kan ook ’n groen handsak of skoene by blou dra – analogiese kleure (blou en groen is lanks mekaar op die kleurwiel). Analogiese kleure skep die meeste harmonie, die kleurkombinasies is nie so oorweldigend nie.

4. Of kies neutraal

Indien jy nie mal daaroor is om verskillende kleure saam te dra nie – kies dalk eerder neutrale kleure soos room en beige, selfs wit en swart patrone lyk fantasties by ’n helder kleur. Jy kan ’n roomkleurige uitrusting of rok met swart en wit patrone by enige helder kleur handsak of skoen dra.