’n Kraaghemp is soveel meer as net ’n stapelitem vir kantoordrag. Dink nuut oor hoe jy jou kraaghemp kan meng en pas om ’n hele paar nuwe uitrustings te skep. Deur Suzanne Kotzè
Dra jou kraaghemp só
1. Klassiek, ingesteek by ’n hoë-middellyf broek
Hoë-middellyf wyepypbroeke bly ’n staatmaker voorkoms wat mooi lyk ongeag jou ouderdom. Ysblou en bruin bly ’n gewilde kleurkombinasie, wat meer onverwags as jou staatmaker swart broek en wit hemp is. ’n Gordel om jou broek is ’n moet.
2. Saam met ’n patroon broek
Of dit nou strepe saam met strepe, of effekleur saam met tiervel is; gee jou oopknoophemp ’n tikkie oemf deur dit saam met ’n patroon te dra.
Lees meer oor patrone en patrone meng hier:
3. Ontspanne en oopgeknoop
Gee jou oopknoophemp ’n ontspanne naweekvoorkoms deur dit saam met ’n lospassend broek of denim, T-hemp, tekkies en keps te dra.
4. Saam met ’n geknoopte dun gordel
Foto: Pinterest
Ideaal as jou hemp oorgroot is, en jy steeds jou middel wil beklemtoon. Hierdie langer bermuda-styl kortbroeke is natuurlike groot nuus vir somer.
5. ’n Sjiek serpie om jou nek
’n Kraaghemp met ’n sjiek serpie om jou nek gebind, is nou vreeslik in, en nee jy sal nie soos ’n lugwaardin lyk nie. Bind net jou serpie onder jou hemp (en nie bo-oor jou kraag nie!).
6. ’n Driehoek gevoude serp om jou middel
Steek jou kraaghemp in, en bind ’n serp om jou middel. ’n Blitsige manier om jou uitrusting van vervelig na modieus te neem.
7. ’n Serp om jou skouers
Sit kleur by jou kraaghemp-uitrusting deur ’n serp (let wel ’n sy/satynserp en nie jou ‘naughties’ pashima nie!) netjies om jou skouers te bind.
8. Saam met ’n maksiromp
Maksirompe is steeds groot nuus vir somer. ’n Noupassende maksi-romp en kraaghemp is ’n elegante keuse.
9. Oopgeknoop bo-oor ’n slooprok
Foto: Pinterest
Gee jou staatmaker slooprok ’n nuwe voorkoms (en steek jou arms weg, as jy selfbewys voel) deur ’n oopgeknoopte hemp bo-oor te dra. Dit werk ewe goed saam met wit as kleur.
10. Satynromp en keps
Foto: Pinterest
Skuins gesnyde (bias cut) satynrompe is een van ’n somertrend en ons is mal oor hiedie bottergeel kleur. Sit ’n keps by vir ’n ongeërgde koel voorkoms en dra dit saam met hierdie thong somersandale
11. In die ‘in-kleur’ akwa-blou
Foto: Pinterest
Akwablou is een van somer se gewildste kleure en dit gee ’n kraaghemp beslis die koelfaktor.
12. Onder ’n kant-detail slooprok
Hierdie is ideaal as jy nie wil arms of bra-bandjies wys nie. Dra ’n kraaghemp onder ’n kant-detail (steeds ’n reuse-trend vir somer!) slooprok. Wenk: maak seker jou hemp is meer noupassend aangesien ’n oorgroot hemp te bonkig sal wees. Jy kan dit natuurlik ook bo-oor dra.
13. Saam met ’n kant-detail kortbroek
Ja die kort pajama-styl kort kantbroekies is hoogmode, maar genadiglik ook die langer bermuda weergawe. Dra dit saam met ’n kraaghemp vir ’n meer styvolle, en minder ‘tienerige’ weergawe.
14. Bo-oor ’n deursigtige romp
Deursigtige rompe en rokke bly groot nuus. Vir die van ons wat nie gemaklik daarmee is om broekies en boude te wys nie, is ’n oorgroot kraaghemp ideaal. Wenk: dra gerus ’n gordel om jou middel as die oorgroot-voorkoms nie vir jou werk nie.
15. Gevou en met ’n borspeld vasgesteek aan die kant
Hierdie werk goed met oorgroot hemde.
16. Om jou lyf gebind
Hierdie voel dalk vreemd, om een knoophemp aan te hê en nog een om jou lyf te bind (a la sweetpakbostukke wanneer ons oefen en warm kry). Maar dit is so gewild dat mens selfs hemde en hemprokke kry met ’n ekstra hemp deel by om om jou middel of skouers te knoop.
17. Geknoop in die middel
Hierdie werk ewe goed saam met rompe as oor rokke en by broeke. Knoop jou hemp toe tot waar jy die knoop wil maak en knoop dit soos in die stap vir stap foto’s.
18. Saam met ’n tikkie blink
Die kontras van ’n blinkerromp en kraaghemp lyk vars en modern.
19. Blou en rooi saam
Blou en tamatierooi saam is op die oomblik een van ons gunsteling kleurkombinasies.
20. Agterstevoor
Hierdie manier van jou hemp agterstevoor dra was groot nuus op die loopplanke en gaan saam met die dekonstruktiewe mode-trend wat nou weer nuus is.
Kraagkopies
- Moenie skaam wees om uit jou man se kas ’n kraaghemp te leen nie, veral as jy van plan is om dit oop te dra.
- As jy ’n groter borsmaat het, hou ’n skuifspeld byderhand om die deel tussen die twee knopies oor jou borste vas te steek. Of werk ’n ekstra drukknopie in die binnekant aan hiervoor.
