Omskep jou badkamer in ’n lieflike ontspan-area deur ’n paar badkamerbykomstighede aan te skaf en slim stileerwenke te gebruik. Deur Suzanne Kotzé. Foto’s: The Home Collective
Badkamer-bykomstighede en stileerwenke
Dikwels dink ons nie veel aan hoe ons badkamers lyk nie, en dink jy moet jou badkamer oordoen, om dit te laat mooi lyk. Ons nooi jou uit om nuut te dink daaroor en die spasie wat jy reeds het, sodat dit ’n spasie word wat nie net funksioneel is nie, maar ’n heerlike hawe vir ontvlugting en ontspanning.
Dekorstiliste Kalinka Nigrini en Heloise Louw van The Home Collective gee raad.
Badkamer-stileerwenke
Stileer jou spieëltafel
’n Spieëlkas kan so maklik ’n neersitplek word vir ’n hoop skoonheidsprodukte. Wees selektief met wat jy daarop neersit. Slegs jou elkedag-produkte (die res kom in ’n laai of kas). Kry ’n mandjie of ’n houer waarin jy produkte neersit en stal net die mooiste uit.
Kalinka se raad is: “Stileer jou spieëltafel met ’n mooi bakkie vir juwele, ’n ‘bud vase’ met ’n blom of takkie. Maak dit ook funksioneel deur jou grimeerkwassies of watte in ’n mooi glas of houer te sit en alles op ’n skinkbord uit te stal.”
’n Badplankie skep atmosfeer
“’n Bad kan baie plek in jou badkamer opneem en soms kan dit ’n bietjie van ’n vervelige spasie wees. Omskep dit in ’n spasie wat jou uitnooi om te bad. ’n Badplankie of badskinkbord met ’n paar mooi badprodukte, parfuumkerse en ’n paar takkies kan baie mooi lyk.”
Heloise se raad is: “Jy hoef nie noodwendig ’n badskinkbord te koop nie. ’n Afvalplank kan net so goed werk.”
Vervang die spieël
Kalinka sê: “Vervang gerus die spieël in jou badkamer. Dit kan dadelik ’n mooi fokuspunt wees en jou hele spasie laat nuut voel. Moenie bang wees om ’n groot spieël in ’n klein spasie te hang nie.”
Swewende rakkie skep ’n visuele fokuspunt
“Indien daar ’n oop muur is, en ’n mens wil geld spaar op teëls, is dit ’n goeie plan om ’n swewende rakkie op te sit. So kan jy die area mooi stileer. Kuns het ook ’n plek in ’n badkamer; kies iets wat mooi inpas by jou tema en nie die spasie sal oorheers nie,” sê Kalinka.
Heloise stem saam: “’n Swewende rakkie is ’n relatiewe goedkoop en maklike manier om karakter aan jou badkamer te gee. Let wel dat so ‘n rakkie nie oorvol goetertjies gepak moet word nie. Hou ingedagte dat hierdie ’n uitstal (en nie ’n neerplak nie) ruimte moet wees wat bydra tot die estetiese gevoel van jou badkamer. Jy kan natuurlik praktiese items soos ekstra waslappe of badsout hier bêre, mits dit in mooi houers is.”
Mooi bottels vir produkte
“Om jou stort-area of die spasie langs jou bad the help ontklotter en net meer esteties te laat lyk, help dit as jy jou produkte in mooi bottels uitgooi.
Jy kan mooi glasbottels aanskaf hiervoor of die ‘duurder’ produkte koop (veral as dit by jou kleure of spasie pas) en dan later net gewone lyfwas of sjampoe of opknapper hierin oorgooi,” sê Kalinka.
Gebruik oortollige verf en muurpapier
“’n Slim manier om ’n klein badkamer op te kikker is as jy miskien oortollige verf of muurpapier het. Gebruik dit op jou plafon eerder as teen die mure. Dit maak ’n oulike fokuspunt deur jou oog op te trek, en vernuwe die hele spasie.”
Badkamerbykomstighede op Stylvol se wenslysie
Swewende rakkies
Onthou om nie net enige rakkie in jou badkamer te gebruik nie, want die stoom kan houtrakkies laat wel of metaalrakkies laat roes.
Stortrakkies
Badskinkborde
Mooi bottels en houers
Uitstalborde
Onthou, jy kan enige mooi skinkbord wat jy het of selfs ’n opdienbord of groot ronde bord gebruik.
Bottelhouers
Spieëls
Handdoekplanne
Stylvol-vriendin Natasja Mostert van Orden sê: “As jy ’n houer met ’n tikkie bling soek, het ons onlangs die baie bekostigbare caddy (Caddy – R80) van @PrettySpaces raak gesien. Hulle het ook ’n verskeidenheid van ‘Storage Solutions’ om handoeke in te stoor.
Lees ook: Badkamer regruk
