Komaan somer! Ons sien uit na nog van hierdie warmer dae met minder lae. Ingeval jy solank jou Lente/Somer klerekas wil regkry en voel jy het ’n paar trendy items nodig – hier’s ’n lys van die Lente-somer modetrends en seisoen se moet-hê mode-items. Hier is 21 van ons plus stylkenners se gunstelinge vir hierdie komende seisoen. Deur Justine Kroes
30/08/2024
21 Lente-somer modetrends
1. Bubbledress skirt
Die “bubble of balloon” romp/rok is terug, jip, daardie selfde silhoeët van die 80’s en vroeë 2000’s is weer hier om te bly, wat weereens bewys dat ons nie altyd ou gunstelinge hoef te laat gaan nie!
Die 2024 bubblerok of romp is of kort, (minilengte) of langer (midi tot maksilengte).
2. Wit, wit en meer wit
Stylkenner en voorkomskonsultant Simone Lombard (@simlombard_image op instagram), sê “Die twee items waaroor ek die meeste opgewonde is, is die skakering wit en die wit katoen poplinromp”
“Wit, wit en wit is in. Wit met tekstuur, patrone, dink selfs aan gehekelde wit rompe, katoenrokke, en alles, alles en enigiets wit – ek kry my voorskoot reg! sê Simone
Dan is die katoen poplinromp ‘n moet-hê. Dit is ’n maklike item om van winter na somer te dra, die materiaal (katoen) is lig genoeg vir warm dae en dit skep ook ’n gesofistikeerde voorkoms, omdat die romp meer struktuur het. Dis ook vleiend vir die meeste ligaamstipes. Jy kan dit op verskillende maniere stileer, afhangend van hoe jy die dag voel. Byvoorbeeld tekkies en ’n t-hemp of ’n kraaghemp en sandale.
3. V-styl lae middel rok
Eers het die “drop waist” rok silhoeëtt teruggekeer, (die lyn waar die rok uitklok is gewoonlik van die heupe af ondertoe) en hoewel dit gewild geraak het, is dit nie noodwendig vir alle lyfvorms ’n vleiende rokstyl om te dra nie. Die V-middelyn rokke en silhoeëtte is ongelooflik vleiend en die V wat gewoonlik voor van jou naeltjie af ondertoe wys, speel truuks met verbygangers se oë, dit laat jou lanker, slanger en stylvol lyk!
4. Kontras stikwerk
’n Moderne trend wat vanjaar gewild is – duidelike stikwerk op klere-items wat wat doelbewus gemaak is om uit te staan. Swart stikwerk op wit en wit stikwerk op swart lyk na die mees populere keuse.
5. Assimmetries orals
Assimmetrie in mode-ontwerp is niks nuut nie. Vanjaar fokus die trend op assimmetriese skouers en amper ’n “koue skouer” ontwerp. Die een skouer het baie minder materiaal as die ander, maar ook maar net net.
Daar is ook tans ’n duidelike liefde vir rompe en bloese se onderpunte wat assimmetries skuins gesny is.
6. Pragtige Peplum
Of jy daaarvan hou of nie, die peplum bloes (en selfs op rokke) is terug en hier om te bly.
Wenk: Kies ’n peplum wat jou lyfvorm die meeste vlei, eksperimenteer met waar die peplum uitklok teenoor waar dit sit op jou lyf.
7. Skoene met bandjies (slingbacks)
Stylkenner en voorkomskonsultant Lizanne Anderson (@hellobeautiful_imageandstyle op Instagram) sê “Die lekkerte van hierdie trend is dat dit ’n gemaklike styl is en dat elke persoon kan wegkom met ’n sling back skoenstyl – soos dit jou stylpersoonlikheid pas.
Jy kan ’n plat sool sling back kies vir ’n elkedag voorkoms of een met ’n hakkie vir ’n meer formele uitrusting.
8. Deursigtig
Lizanne verduidelik “Ek is mal oor hierdie trend, want dit gee jou uitrusting dadelik ’n ekstra dimensie en net daai tikkie interessantheid”.
Hierdie mag dalk soos ’n uitdagende trend voel maar Lizanne sê “Jy hoef nie noodwendig alles te wys nie – jy kan byvoorbeeld ‘n bloes dra met pragtige deursigtige moue, of ’n deursigtige hemp met ’n onderkledingstuk aan. Of as jy wil, ’n deursigtige romp met ’n soliede materiaalromp onder as ’n basis.”
9. Grafiese T-hemde
Simone sê T-hemde met ’n grafiese patroon of letters daarop is ook hierdie lente/ somer ’n moet-hê item. Dra by denims, rompe en selfs pakke.
Wenk: kies een wat jy weet by baie items in jou klerekas sal pas om die meeste “dratyd” daaruit te regverdig.
10. Hoë middelyf broeke
“Dankie tog” is stylkenner Simone se aanmerking – verby vir eers met die “low rise” broeke en terug met die hoë en ultra hoë silhoeëtte vir broeke om jou middelyf. Dit is beslis meer vleiend en vroulik!
Ons moet hier saamstem en uiter ’n sug van verligting dat die lae broekstyl vir eers verby is!
11. Balletskoene met ’n verskil
Danksy die die “balletcore” modetendens is die balletskoen nou al ’n rukkie ’n mode moet-hê, maar die somer is die mesh, of eerder deursigtige, balletskoen die modegunsteling.
Psst onthou – afhangend van hoe deursigtig jou balletskoen is, maak seker jou voete en naellak lyk steeds netjies, jy wil steeds afgerond lyk!
12. Vissermansandale
Volop tydens die 2024 Internasionale Lente Somer modevertonings, is hierdie bonkige sandaalstyl. Dra gerus hierdie sandale met bonkige sole en bandjies by ’n vroulike kledingstuk om balans te skep.
13. Strikke
Strikke is hier om te bly, groot of klein. Volgens sosiale media is dit duidelik dat die katoen bloese in alle skakerings en patrone wat met strikkies voor vasmaak ’n seisoengunsteling gaan wees.
Stylkenner en voorkomskonsultant Jeanine Thereon (@transformed_by_jeanine op Instagram) sê “Toppies wat voor vasmaak met strukkies is vanjaar ’n moet-hê vir Lente/Somer. Ek is gaande oor die romantiese style wat orals in Europa te sien is – vroue wat bloese in peplum style met strikkies dra.
14. Metale wat blink
Lizanne sê “Vanjaar kan jou metaal enige kledingstuk wees, van ’n baadjie tot jou skoene, in goud, silwer, brons, roosgoud of sjampanje. Moenie bang wees om hierdie Lente/Somer met hierdie trend te eksperimenteer nie. Probeer iets soos ’n sagte goue midiromp of roosgoud balletskoene of selfs ’n metaalkleurige baadjie vir ’n mooi aandvoorkoms.
Lizanne se wenk: “Een van my gunsteling maniere om met metaalkleure te eksperimenteer, is om ’n alles-in-een-kleur uitrusting (soos vlootblou of denim) te kombineer met metaalkleurige bykomstighede soos roosgoud slingback hakkies of ’n palmtas”.
15. Gingang gaan groot
Jeanine sê “Die Cottage Core tendens is ook ’n groot mode moet-hê vir hierdie somer. Dink aan gehekelde bloese en gingang patrone. “Dit maak my vreeslik opgewonde en gee vir my ’n gemaklike “ek is tuis” gevoel. Ek dink sommer terug aan die goeie tye in my ma se kombuis en al haar laslappies,” verduidelik Jeanine. “Die gingang patroon modes het my baie geïnspireer en ek moes dit net deel maak van my nuwe reeks.”
16. Die nuwe onderbaadjie
Lang linne vests/ onderbaadjies, sê Jeanine is nog ’n gewilde mode-item vir die somer hierdie jaar. Onderbaadjies is effens langer as vorige seisoene s’n, en wat effens oopklok aan die voorpunt. Dra dit by rompe, denims, oor rokke of selfs kortbroeke.
Ons hou veral van die moulose style wat jy sommer oor ’n T-hemp kan dra sou jy wou “layer”.
17. Mouloos/boobtube
Nooit het ons gedink ons gaan weer die woord “boobtube” uiter nie, maar hier is ons nou! Hierdie ontwerp is volop – van “bubble” boobtube silhoeëtte tot interessante valle en afwerkings, reuse strikke of blomme– die boobtube of afskouer en moulose bloes of rok is nog een vir jou modelysie.
18. Nederig netjies
Die helder pakke is steeds gewild maar dié Lente/Somer seisoen is daar ’n duidelike terugkeer na neutral, “discreet” soos die trend genoem word, netjiese pakke. Dink aan neutrale uitrustings in swart en wit, bruin of beige met klassieke silhoeëtte van baadjies, broeke, en potloodrompe. Minimalisties sjiek is ’n goeie beskrywing vir die trend.
19. Preppy en sportief
Danksy die aanloop tot vanjaar se Olimpiese spele is daar ’n duidelike modebeweging na die sportiewe, preppy voorkoms. Dink aan polohemde met krae, kort tennisrokkies en rompe, maar stylvol en elegant gestileer. Hierdie modetrend maak dit maklik om na (of voor!) jou Padel- of tennisoefening uit te gaan en steeds modieus te lyk.
20. Pajamas aldag heeldag
Die lyn van verskil tussen dagdrag en slaapklere word by hierdie modetrend al hoe meer vaag! Dink aan oorgroot kraaghemde, gemaklike broeke en bypassende katoenstelle in streeppatrone.
21. Patrone op ons radar:
Sebra-patroon
Strepe
Luiperdmotief
