Die kraaie (en ons) gaap behoorlik met die warm weer; hier is ’n paar van ons gunsteling waterbekers en -bottels, om te help dat jy gehidreerd bly. Van jou yskas, tot vir sport en vir die tafel. Deur Suzanne Kotzé
Waterbekers met deksels vir die yskas
Jy gooi vir jou ’n yskoue glas water uit die beker in die yskas, en dan proe die water ene yskas. Nee dankie! Daarom verkies ons bekers en bottels met doppies op.
Stylvolle waterbekers/kraffies vir die tafel
Sit tydens ete ’n heerlike beker yskoue water op die tafel, en dalk vra jou kinders nie eers vir koeldrank nie. Tydens kuieraande met vriende help dit natuurlik ook om drankies met water af te wissel; maak dit maklik vir jou gaste deur altyd water op die tafel te hê.
Probeer ook gerus gegeurde water; as jy nie van gewone water hou nie.
Jou eie gegeurde water
As jy verveeld word met die smaak van water is hierdie tipe waterbottels ‘n goeie opsie.
Van ons gunsteling gegeurde waterkombinasies is
- Suurlemoen
- Lemoen en kaneelstokkies (veral lekker gedurende die winter)
- Komkommerskyfies en kruisementblare
- Kiwi, aarbeie en suurlemoen
- Waatlemoen en basilieblare
- Pynappel en kruisementblare
Wag so ’n halfuur nadat jy die bestanddele by jou water gegooi het sodat die geur lekker in die water kan intrek.
Geinsuleerde bottels
Hierdie bottels hou koue drankies koud en warm drankies warm. Dit bly ’n gunsteling om in te pak skool toe en is ook ideaal as jy dalk nie so baie water op een slag teug nie, en jou water wil koud hou op jou lessenaar of terwyl jy bestuur.
Glasbottels
Glas drinkwaterbottels is dalk nie ideaal om vir jou kinders in te pak skool toe nie (hierdie het ons al op die harde manier geleer), maar dis heerlik vir tuisgebruik, of vir langs jou lessenaar (veral as jou kantoor koue water het waar jy gereeld kan gaan vol maak).
Bekers wat water filter
As jy nie ’n watersuiweringskraan in jou kombuis het nie, is hierdie goeie alternatiewe.
