Nadat ons ‘Anatomy of a Scandal’ gekyk het, het Sophie (Sienna Miller) se klassieke, luukse styl ons so geïnspireer dat ons net eenvoudig ’n storie moes doen hieroor. Dink aan rolkraagtruie, aardse skakerings, jasse en elegansie. Deur Suzanne Kotzé en Justine Kroes
06/05/2022
Anatomy of A Scandal Styl
As jy nog nie ‘Anatomy of a Scandal’ op Netflix gekyk het, doen jouself ’n guns en kyk dit! Die storielyn, is boeiend, maar so ook Sienna Miller se kleredrag en styl. Dink aan ‘Upper East Side’ elegansie, met geen handelsmerke wat wys nie. Ons het geld maar ons wys dit nie.
In ’n onderhoud met Harper’s Bazaar het Sienna Miller gesê: “Daar is ’n storie wat jy vertel deur wat jy dra.” Sy sê: “Soos toe sy (Sophie) kragdrag (powerdressing) gedra het, het ek besluit om my jas net op my skouers te dra.”
Kostuumontwerper vir die reeks, Sam Perry, het verduidelik
“Sophie se styl is amper ingetoë met langmourokke, jasse en eenvoudige stapelitems wat eintlik wys wat die moderne vroue vandag graag sal wil dra”.
Vergeet van manlike pakke (power suits), eerder rolkraagtruie en sjiek gedetailleerde jasse wat ‘n stelling maak. Sag (en gemaklik) maar steeds treffend en sterk.
Sienna Miller was nog altyd ’n styl-ikoon (Justine se dogtertjie is selfs na haar vernoem) en haar stylikoon status het beslis vir ons ’n nuwe hoogte bereik na die reeks!
Steel so die klassieke, luukse styl van ‘Anatomy of a Scandal’ se Sophie
Dra so jou jas op jou skouers sonder dat dit afval
- Maak seker die materiaal van jou bloes of rok wat jy onder jou jas dra is nie dieselfde as jou jas s’n nie. Byvoorbeeld as jou bloes ’n syerige gevoel het en die voering van die jas is ook syerig sal die materiaal maklik kan afglip. Probeer twee verskillende materiale soos ’n syerige bloes en ’n woljas byvoorbeeld wat bietjie meer houvas sal hê.
- Let op na hoe die jas rondom jou skouers sit – indien moontlik, kies ’n jas wat ’n klein bietjie groter is om jou arms en skouergedeelte. As die jas nommerpas om jou skouers sit, sal dit moeilik wees om met die gedrapeerde stilering aan te hou. Met ’n effense groter jas is dit makliker om jou jas om jou skouers te hou. Jy kan so ook meer bonkige items soos truie onder jou jas dra vir daardie ekstra koue dae!
- Dra eerder ’n palmtas, of klein handsakkie in jou hand, onthou jou skouers is nou die jas s’n! ’n Sak wat om jou lyf kruis (crossbody bag) onder aan kan ook werk.
- Kies ’n jas in ’n swaar materiaal wat goed sal bly sit rondom jou skouers. Dit sal verseker dat jy nog lekker kan beweeg en selfs vir ’n vriendin waai sonder dat jou jas afval.
Nog ’n paar uitrustings geïnspireer deur Sophie Whitehouse
Dink aan rolkraagtruie, jasse en woorde soos sagte kragdrag.
Kameelkleurige jasse
Rolkraagutruie
Gemaklik maar sjiek
Kyk Anatomy of a Scandal hier;
