Met stille luukse dekor is die fokus daarop om jou huis in ’n spasie waar jou sintuie gestreel word te omskep. Die fokus van die stille/rustige luuksheid (quiet luxury) dekortendens is is op eenvoud en kwaliteit. Deur Suzanne Kotzé
Wat beteken stille luukse dekor?
Laasjaar was onderbeklemtoonde luukse (jy ken dit dalk as quiet luxury) ’n groot mode-trend. Dink aan monokrome roomuitrustings, geen sigbare handelsmerke nie (as jy weet, weet jy), kwaliteitmateriaal, afgerond met klas sonder om hoegenaamd uitspattig te wees. Ou geld …
En hierdie tipe voorkoms het nou ook oorgespoel na dekor.
Eenvoud en kwaliteit om ’n stil en rustige spasie te skep, word gevier.
So kan jy die gevoel van stille luuksheid in jou huis skep
Hou jou kleurpalet eenvoudig
Skep ’n stil en rustige gevoel deur by neutrale skakerings soos room, beige, hawermout en greige te hou.
Tekstuur en materiaalkeuse is belangrik
“Ontwerp vir die sintuie deur te fokus op tekstuur en natuurlike materiale in skakerings van hawermout en room.”
Sally Silke, trendspesialis vir die TFG- groep
Bring ekstra tekstuur in met strooikussings (maar nie te veel nie), sagte matte en gordyne.
Hout, marmer en metaal
Beige marble tic tac toe fossil (R699)
“Meng verskillende houtsoorte met marmer en metaal, maar bly by dieselfde kleurspektrum, sodat die harmonie nie versteur word nie,” veruidelik Sally.
Kies tydlose meubels
Hou jou meubelkeuse tydloos en klassiek, so amper asof jy dit dalk kon geêrf het, sonder dat dit outyds lyk.
Hou patrone eenvoudig
Oordadige patrone pas nie by hierdie voorkoms nie. Kies eerder klassieke, subtiele patrone soos effense streep, blok of sirkelpatrone. Vermy oordadige patrone aangesien dit die rustigheid van die voorkoms kan versteur.
Of dink eerder aan tekstuur as jou nuwe patroon. In plaas van stooikussings met patrone, kies dit eerder in verskillende tekstuur soos linne, bouclé en fluweel (in neutrale skakerings natuurlik.)
Kwaliteit bo kwantiteit
Kies minder, maar beter kwaliteit.
Voeg ’n tikkie ‘oud’ by
Meng oud en nuut om die ‘ou geld’ gevoel te kry. Dit beteken nou nie jy moet nou weer ’n bal-en-kloustel nader trek nie. Dink eerder aan ’n ou hout laaikassie, mooi koffietafel of ’n koper blompot. Die tikkie oud maak die voorkoms meer individueel.
Boekrak
Ons glo boeke kan beslis ook bydra tot die rustige luukse voorkoms. Of dit nou mooi mode-koffietafelboeke is, of leesboeke en dekoritems saam uitgestal.
’n Mat is ’n moet
’n Los mat of tapyt in ’n luukse tekstuur is ’n moet om hierdie stille luukse gevoel te skep.
Foto: Pinterest
’n Tikkie groen
Vars (nie plastiek!) groen blare of takke in ’n mooi blompot rond die voorkoms af. So asof jy nou net deur jou tuin gewandel het, en dit gepluk het.
