Dit wat oud is, is nou weer nuut. Die Pa-modetendens (Dad fashion trend) met oorgroot silhoeëtte, lospassende kledingstukke en bonkige skoene is ’n 90’s modetendens wat ons nie heeltemal sal afskryf nie. Hierdie trend het die potensiaal om super cool te lyk mits dit reg gestileer word met ’n moderne aanslag. Hier is ’n paar wenke om dit makliker te maak om uit jou pa, man of kêrel se klerekas aankope te doen! Deur Justine Kroes
10/06/2022
5 Wenke vir ’n moderne Pa modevoorkoms
1. Balans is belangrik
Ons raad – balanseer altyd jou proporsies. Dit beteken as jy ’n groot, lospassende baadjie dra, maak seker dat dit wat jy aan die onderste gedeelte van jou lyf dra, noupassend is. Kombineer byvoorbeeld jou boyfriend blazer met noupassende of regaf jeans, ’n potloodromp of selfs ’n fietsrystyl kortbroek. Die teenoorgestelde is ook waar: as jy ’n lospassende onderstuk dra, kies ’n meer styfpassende bostuk hierby.
Probeer ook om nie meer as twee of maksimum drie “dad fashion” items terselfdertyd te dra nie, oorgroot denims by ’n lospassende shacket met bonkige skoene daarby en sommer ’n korfbal pet ook sal dalk net te veel wees en jy lyk blitvinnig soos ’n Slonsige Sarie.
2. Kies ’n bonkige skoenstyl wat jy werklik sal dra
Die “dad shoe”, soos dit in modekringe bekend staan, is vanaf 2018 ’n gewilde modegier. Dis veral duidelik vanuit die die gebeure toe die modehuis Balenciaga se Triple S Sneaker letterlik oornag wêreldwyd uitverkoop het. Hierdie trendy styl pronk steeds aan die voete van bekendes soos Bella en Gigi Hadid. Maar die bonkige styl eindig nie net by tekkies nie – daar is selfs nou bonkige loafers en stewel “dad” skoene om van die te kies. Ons raad – kies die skoenstyl wat jy werklik sal dra.
Wenk: Dra jou bonkige dad shoe by ’n romp of rok as jy die voorkoms wil versag. Die styl lyk net so trendy by ’n super moderne pak.
3. Kombineer met vroulike bykomstighede
As jy huiwerig is dat hierdie voorkoms te hard en slonsig sal voorkom – dra vroulike bykomstighede soos hangertjies, oorbelle, ’n fyner, kleiner handsak of gepunte skoene daarby.
4. Hare en grimering is belangrik
Maak seker jou hare en grimering is netjies afgerond, ’n effense slonsige klerestyl roep vir ’n afgeronde skoonheidsvoorkoms. Iets so eenvoudig soos ’n helder lipstiffie en netjiese (skoon!) hare sal sorg dat die hele uitrusting meer vroulik en afgerond lyk.
5. Hierdie items het jy nodig vir ’n “Pa modevoorkoms”:
Lospassende broeke
Verruil jou noupassende “skinnies” vir ’n “straight leg” of wyepypsnit – jy sal dalk nou verstaan waarom jou pa hierdie styl verkies – dit is uber gemaklik! Onthou – om die voorkoms modern te hou, kombineer die met ’n styfpassende bo-stuk of bo-stuk met struktuur.
Oorgroot baadjies en jasse
Van oorgroot blazers, denim of sweetpak baadjies en shackets is dit een van die maklikste items wat jy uit jou Pa of man se klerekas kan steel.
Wenk: As jy dié oorgroot trend wil aanpak maar nie wil lyk asof jy verdrink in jou klere nie, moet jy onthou om jou proporsies te balanseer. Met die lospassende baadjie aan jou bo-lyf, maak seker jy dra noupassender silhoeëtte aan jou onderlyf.
Oorgroot hemde
Of dit nou T-hemde of opknoop hemde is – beslis ’n stapel in die 90’s Pa mode klerekas.
’n Klassieke bofbalkeps
’n Keps bly nou maar ’n Pa se gunsteling en ons dink so ’n keps by die regte uitrusting lyk in die kol 90’s koel!
Vessies bo oor hemde
Hierdie voorkoms bly trendy. Dra jou vessie of onderbaadjie bo-oor oorgroot rokke of kraaghemde om definisie rondom jou middellyf te skep. Gebreide onderbaadjie-vessies is tans ’n populêre keuse in bont patrone en opwindende skakerings.
