Vanjaar is helderrooi en donkerrooi gewilde skakerings in die modewêreld – maar meer as dit is die oorheersende tendens om ’n “pop of red” – net ’n tikkie rooi by jou uitrusting te dra. Hierdie stileertruuk word al hoe meer gebruik en is ’n modetrend wat nog ’n rukkie met ons sal bly. Ons dink die “pop of red” stileertruuk is maklik genoeg vir enige iemand om reg te kry en lyk super gesofistikeerd. Deur Justine Kroes
29/03/2024
Hoe werk die “pop of red” stileertruuk?
Met hierdie trend is die idee om een (of selfs twee) rooi items by jou uitrusting aan te trek sodat daar (soos die naam dit eintlik beskryf) ’n “pop of red” of tikkie rooi in jou uitrusting is. Kies ’n mode-item in rooi, of dit nou ’n handsak, broek, romp, skoene of selfs trui is, net daardie tikkie rooi maak ’n reuseverskil aan ’n andersins eenvoudige uitrusting.
Die “pop of red” was duidelik ’n gunsteling onder modekenners en stylikone wat AW 2024 se modeweke bygewoon het. Die bekende “street style” fotograaf @despi_naka op Instagram het dit met haar goeie oog vasgevang.
Hoekom ons daarvan hou
Hierdie truuk maak rooi dra meer toeganklik
Rooi word gewoonlik as ’n “ekstroverte” of meer gewaagde kleurkeuse gesien – maar om rooi op hierdie manier te dra maak dit meer toegangklik vir die meeste van ons.
Dit bly ’n minimalistiese manier om rooi as ’n kleur te dra.
Ideaal vir die wat nie rooi naby hul gesigte kan dra nie
Hierdie trend is ideaal vir die wie se gelaat of veltoon dit nie toelaat om rooi naby hul gesigte te dra nie. Skoene of ’n handsak sal byvoorbeeld vir jou die truuk doen.
Super maklik – meeste van ons het reeds iets rooi
’n Super maklike styltruuk wat byna geen moeite verg nie – die meeste van ons het reeds iets roois in ons klerekaste!
Jy lyk blitsvinnig gesofistikeerd
Daardie tikkie rooi verhef dadelik enige uitrusting en laat jou sjiek, stylvol en gesofistikeerd lyk.
Alternatief vir helderrooi – donker rooi:
As helderrooi nie vir jou is nie, probeer gerus ’n dieper, donkerder rooi met jou “pop of red” stilering, loer hier:
Donker rooi bykomstighede:
“Pop of red” stylinspirasie:
Vir ’n meer treffende “pop of red”-effek, stileer jou uitrusting met minstens twee rooi items, byvoorbeeld ’n rooi handsak en ’n paar rooi skoene”
Bind ’n rooi trui om jou skouers
Kies ’n paar rooi tekkies, hakskoene of “pumps”
Dra ’n rooi broek of romp
Kies ’n rooi baadjie
Rooi bykomstighede
