Die heel mooiste moet-hê vakansiemode items, van plakkies en haar-scrunchies tot handdoeke en koel-sakke. Ons wys graag 10 van ons gunsteling bykomstighede om jou reg te kry vir daardie strand uitstappies. Deur Justine Kroes.
Plakkies
Gaan groot met jou plakkies in 2020 – skoene is meer bonkig, blink en groot. Probeer ’n slag ’n paar ‘flatform’-plakkies (onthou jy die 90’s!?), of plakkies met versierings op, waterdigte plakkies is ook altyd ’n wenner.
Hoed
Vanjaar is die emmerstyl-hoed en hoede wat onder jou ken vasbind groot nuus. Die hoede wat vasbind is ook so handig en sal nie maklik in die wind afwaai nie. As jy ‘n kombinasie van die emmerstyl-hoed vind wat kan vasbind, nog beter!
Strandsak
Dink aan jou strandsak as ’n handsak vir die strand, een wat genoeg spasie het vir al die ander bykomstighede onder die son. Kies een wat waterdig is, lekker sakkies aan die kante het (vir motorsleutels, kontant en lipsalf), maar een wat weereens by jou persoonlike styl pas. Hier is ’n paar mooi opsies:
Haar-scrunchies
Onthou in 2020 is die tagtigerjare weer terug, en die haar-scrunchie daarby ook. Moet nie vergeet om jou haar-scrunchie in te pak om jou hare vas te maar voor (of na) jou swem nie.
Die gewilde manier om nou jou scrunchie te dra is om jou pols, dit lyk modieus maar is ook handig – so vergeet jy nie sommer jou gunsteling scrunchie by die huis nie.
Bly veilig
Met Covid-19 getalle wat bly styg is dit nou meer belangrik om jou masker te dra en gereeld jou hande te was of ontsmet. Kies ‘n vrolike masker en handige klein ontsmettingsmiddel wat in jou strandsak sal pas.
Strandhanddoek
Handdoeke het beslis die afgelope paar jaar ’n strandmode-bykomstigheid geword. Prettige patrone, kleurvol en bont is vanjaar in die mode. Jy kry nou selfs nuttige opblaas kussings, spesiaal vir die strand.
Koelsak
Die meeste van ons neem graag ’n koelsak saam see toe, om ons drink- en eetgoed urelank koud en vars te hou. Hoekom dan nie hierdie as ’n strand-modebykomstigheid insluit nie. Kyk net na al hierdie unieke en “koel” ontwerpe:
Kaftan
Die kaftan is een van die nommer een moet-hê items vir die strand of swembad – so maklik om net bo oor jou swembroek oor te gooi, en dit lyk altyd stylvol en klassiek. Patrone en kleurvolle kaftans is vanjaar groot nuus, loer hier na van ons gunstelinge:
Lees ook meer hier oor hoe jy jou Kaftan kan stileer vir van strand tot werk en selfs vir ’n aand uit.
Sonsambreel
Beskerm jou nie net teen die son nie maar ’n unieke sonsambreel lyk trendy en is ook ’n maklike manier vir vriende en familie om jou te kry op ’n besige strand! Kyk net hoe mooi is hierdie ontwerpe van A Love Supreme:
Sonbril
Vanjaar is die jaar vir die kat-oog, futuristiese, gekleurde-rame, plat bo-kante en vele meer. Maak seker jy kies ’n sonbril wat jou persoonlike styl die beste verteenwoordig. Moet nie bang wees om trends aan te pak nie, maar onthou daar is niks verkeerd om by ’n klassieke styl te hou wat jy weet by jou gesigvorm pas nie. Lees hier vir die nuutste sonbril trends.
