Hierdie 8 winter-modebykomstighede trends het dadelik ons aandag gesteel. Of jy nou syserpies, gordels of ’n reuse sonbril verkies, hier is iets vir jou! Ons deel die top 8 winter modebykomstighede op ons stylradar wat jou doodgewone uitrusting na ’n 10/10 uitrusting sal omtower. Deur Justine Kroes
Die maklikste manier om met min moeite, modieus te lyk (en te lyk sof jy weet wat in die modewêreld aangaan) is om met jou bykomstighede te eksperimenteer. Dit is ook ’n lekker sakpas manier om in die modekollig te bly.
25/04/2025
1. Syserpe
Syserpe is in maar ons praat nie hier van jou Ouma se serpies nie. Vergeet van daardie lang serpe wat jy om en om jou nek draai (veral daardie met allerhande katte, lettertjies en windpompe op) en kies ’n kleiner “neckerchief”-styl serp.
Hierdie klein veelsydige serpie-styl kan jy rondom jou nek, poniestert, handsak en selfs om jou pols bind vir uitstaan effek.
Dra dit in jou hare so:
Dra dit om jou nek so:
Bind dit vas op jou handsak:
Of dra dit om jou lyf so:
Hier’s ‘n paar om van te kies:
2. Meng jou metale
Beslis nie nuut nie, maar hierdie tendens waar twee of meer metaal juweelskakerings saam gedra word is ’n eenvoudige tendens wat altyd ’n onverwagse, tog stylvolle stelling maak. Dra jou goue en silwer juwele saam – die tendens meen nie net gemenge metale in een juweelstuk nie – juis die mode-vryheid om jou gunsteling metale saam te dra.
3. Sonbrille wat ’n stelling maak
Van reghoekige dun sonbrille verlede seisoen tot reuse groot en amper “gogga” oë sonbrille hierdie seisoen. Indien jy hierdie seisoen wonder; vra jouself – maak hierdie sonbrille ’n stelling? As die antwoord ja is, dan weet jy dit is die regte paar vir hierdie winter seisoen.
4. Boheems-sjiek
Dink enige bykomstigheid in sweedsleer hetsy dit jou skoene of handsak is (fraaings in die geval is altyd welkom), lang halsnoere en groot metaal 70’s styl sonbrille. Enige bykomstighede wat jou boheems-sjiek laat lyk is vanjaar groot mode.
Loer net hier, gordels en serpe met fraiings alles so saam. Onthou dit beteken nie daardie tossel fraiing oorbelle nie. Dra jou fraiings eerder aan jou handsak, gordel of kledingstuk hierdie somer om meer 2025 en minder 2018 te lyk!
5. Gordels
’n Gordel bly een van daardie modebykomstighede wat die krag het om ’n hele uitrusting te transformeer. Dit definieer nie net jou middel nie maar bied ook ’n gepoleerde, netjiese, sjiek en afgeronde voorkoms.
Hierdie seisoen is dit die fokus op gordels wat aandag trek – van ketting gordels, tot groot gespes en selfs ’n hele klompie gordels onder mekaar af om jou middel gestapel.
Nog ’n manier waarop gordels gestileer word vir die winter is bo-oor jou baadjie of wintersjas. Ons hou natuurlik hiervan, dit gee lekker definisie aan ’n oorgroot baadjie of wintersjas en is boonop ’n lekker manier om tekstuur by jou uitrusting te voeg.
6. Mussies en balaklawa’s
Hierdie “om jou hele kop kappie, hoed, mussie- balaklawa” besigheid was eers vir ons vreemd – maar nou is ons 100% in op die trend.
Nie net is dit prakties nie (koebaai kroes reën hare!) maar wanneer die diep donker yskoue winteroggende eers arriveer sal ons nie omgee om hierdie outjies reg bo-oor ons koppe te trek nie. Warm ore, wange en nek! ’n stylvolle warm wen!
7. Uit die see modebykomstighede
Hierdie een is al ’n ruk met ons, maar steeds, groot nuus. Bykomstighede van seester en skulpie-oorbelle tot koraalarmbande en hangertjies met reuse skulpe rondom jou nek. ’n Gunsteling Stylvol trend – dalk omdat ons die see so baie geniet! Hier is g’n reëls nie – kies eenvoudig ’n see-juweelontwerp wat die beste by jou stylpersoonlikheid pas – hetsy dit ’n klein skulpoorbel of ’n reuse seester rondom jou nek is.
8. Borsspelde
Maar ook nie jou Ouma se tipe borspelde nie, dink blink, met interessante sterk ontwerpe.
Die “brooch” is terug en ons is opgewonde oor dié een! Op modeloopplanke, insluitend Johanna Ortiz en Miu Miu se 2025 modevertonings, is die nederige borsspeld besig om ’n terugkeer te maak.
Van klein na reuse oorgroot borsspelde is dit tyd dat daar weer iets interessants op jou borskas pronk.
Lees ook: 9 Tekkie-trends op ons radar
